ភ្នំពេញ៖ មហាសន្និបាតសមុទ្រអាស៊ីបូព៌ាលើកទី៧ ដែលកម្ពុជាធ្វើជាម្ចាស់ផ្ទះ ត្រូវបានរៀចំធ្វើឡើង ក្រោមប្រធានបទ «បង្កើតទសវត្សរ៍ថ្មី នៃសុខុមាលភាពសមុទ្រ មនុស្ស និងសេដ្ឋកិច្ច» បានចាប់ផ្តើម បើកជាផ្លូវការនៅខេត្តព្រះសីហនុ។
កិច្ចប្រជុំនៃមហាសន្និបាតសមុទ្រអាស៊ីបូព៌ានេះនឹងប្រព្រឹត្តទៅចំនួន ២ថ្ងៃ ចាប់ពីថ្ងៃទី១-២ ធ្នូ ឆ្នាំ ២០២១ ហើយជាលទ្ធផលនៃកិច្ចប្រជុំថ្ងៃទីមួយនេះ ទទួលបាននូវផ្លែផ្កាមួយចំនួនលើការដោះស្រាយបញ្ហាសមុទ្រ។
នេះគឺជាលើកទី១ ដែលកម្ពុជាបានទទួលធ្វើម្ចាស់ផ្ទះនៃការ រៀបចំមហាសន្និបាតសមុទ្រអាស៊ីបូព៌ា លើកទី៧ ចាប់តាំងពីការចូលជាសមាជិកនៃអង្គការអន្តរជាតិភាពជាដៃគូ នៃការគ្រប់គ្រងបរិស្ថាន សមុទ្រអាស៊ីបូព៌ា (PEMSEA) កាលពីឆ្នាំ១៩៩៤។
មហាសន្និបាតដែលមានរយៈពេល ២ ថ្ងៃនេះ នឹងប្រព្រឹត្តទៅដោយមានការចូលរួមផ្ទាល់ និងការចូលរួមតាមរយៈប្រព័ន្ធបញ្ជូនសំឡេងនិងរូបភាព ពីបណ្តាប្រទេសជាសមាជិកនៃអង្គការ PEMSEA ចំនួន ១១ប្រទេស ក្នុងនោះ រួមមាន៖ កម្ពុជា សិង្ហបុរី ឡាវ ហ្វីលីពីន ឥណ្ឌូនេស៊ី វៀតណាម ទីម័រ ចិន កូរ៉េខាងត្បូង កូរ៉េខាងជើង ជប៉ុន ព្រមទាំងមានអង្គការដៃគូជាច្រើនទៀត។
មហាសន្និបាតសមុទ្រអាស៊ីបូព៌ាឆ្នាំ២០២១ ដែលបានប្រព្រឹត្តទៅនាងថ្ងៃទី០១ ធ្នូ នេះ មានការបើក កិច្ចប្រជុំនៃ រដ្ឋបាលថ្នាក់ក្រោមការជាតិ នៃបណ្តាខេត្តរបស់ប្រទេសសមាជិក PEMSEA ដែលក្នុងនោះ រដ្ឋបាលខេត្តជាប់មាត់សមុទ្រទាំង ៤របស់កម្ពុជា រួមមានខេត្តព្រះសីហនុ ខេត្តកំពត កោះកុង និងកែប។
តាមការបញ្ជាក់ពី ឯកឧត្តម នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានថ្លែងថា គោលបំណងសំខាន់ៗនៃការរៀបចំមហាសន្និបាតសមុទ្ររួមមាន៖
ទី១) ចែករំលែកមេរៀនជាបទពិសោធន៍ តាមដានវឌ្ឍនភាពការងារកន្លងមក និងពង្រីកបន្ថែមនូវការ អនុវត្តយុទ្ធសាស្ត្រ ដែលបានប្រតិបត្តិនៅថ្នាក់តំបន់ ជាតិ និងរដ្ឋបាលថ្នាក់ក្រោមជាតិ។
ទី២) បង្កើតនិងរៀបចំឡើងវិញនូវយន្តការគ្រប់គ្រងដែលមានស្រាប់ និងជំរុញបង្កើតឱកាសថ្មីៗបន្ថែម ទៀត សម្រាប់ភាពជាដៃគូក្នុងតំបន់ តាមរយៈបច្ចេកវិទ្យា នវានុវត្តន៍ ការវិនិយោគ និងហិរញ្ញប្បទាន ដើម្បីបន្តនិរន្តភាពនៃបរិស្ថានតំបន់ឆ្នេរ និងសមុទ្រ
និងទី៣) កំណត់នូវផែនទីបង្ហាញផ្លូវដ៏ច្បាស់លាស់មួយ សម្រាប់ជាដំណោះស្រាយចំពោះបញ្ហា សមុទ្រនាទសវត្សរ៍ខាងមុខ ដោយអនុលោមទៅតាមផែនការមួយទសវត្សរ៍ របស់អង្គការ សហប្រជាជាតិ នៃវិទ្យាសាស្ត្រមហាសមុទ្រ របៀបវារៈរបស់អង្គការសហប្រជាតិឆ្នាំ២០៣០ អនុសញ្ញាក្របខ័ណ្ឌសហប្រជាតិ ស្តីពីការប្រែប្រួលអាកាសធាតុ និងក្របខ័ណ្ឌជីវចម្រុះសកល ក្រោយឆ្នាំ២០២០ ព្រមទាំងបណ្តាក្របខ័ណ្ឌពាក់ព័ន្ធនានា។
ឯកឧត្ដម បានមានប្រសាសន៍ថា មហាសន្និបាតសមុទ្រអាស៊ីបូព៌ានេះ គឺជាមោទកភាពសម្រាប់ កម្ពុជាដែលបានធ្វើជាម្ចាស់ផ្ទះនៃមហាសន្និបាតដ៏មានសារៈសំខាន់នេះ ដែលរៀបចំឡើងក្នុង គោលបំណងពិនិត្យលើផែនការការងារដែលបានសម្រេចអនុម័តកន្លងមក និងផែនការទិសដៅ ដែលត្រូវធ្វើជាបន្តបន្ទាប់ រួមទាំងការគិតគូរពីមូលនិធិដែលត្រូវយកមកអនុវត្តដើម្បីការពារនិងអភិរក្ស សមុទ្រនៅតំបន់អាស៊ីបូព៌ា។
មុននឹងឈានដល់ការរៀបចំមហាសន្និបាតសមុទ្រឆ្នាំ២០២១ មានព្រឹត្តិការណ៍អមជាច្រើនចាប់ តាំងពីខែមករា មកដល់ខែវិច្ឆិកា ឆ្នាំ២០២១ នេះរួមមានការប្រជុំពិភាក្សាតុមូល សិក្ខាសាលា និងប្រជុំក្រុមប្រឹក្សារបស់អង្គការ ដើម្បីពិនិត្យលើវឌ្ឍនភាពនៃការងារនិងសមិទ្ធផលទាំងអស់ រួមទាំង ការធានាសន្តិសុខស្បៀង ចំណូល និងជីវភាពនៃ មនុស្សដែលរស់នៅតំបន់ឆ្នេរ និងការស្តារឡើងវិញ នូវធនធានធម្មជាតិនៅក្នុងសមុទ្រដូចជា ផ្កាថ្ម ស្មៅសមុទ្រ និងព្រៃកោងកាង រួមនឹងការគ្រប់គ្រង លើការបំពុលទឹក ការប្រែប្រួលអាកាសធាតុ និងភាពធន់ទៅនឹងការប្រែប្រួលអាកាស និងការរស់នៅ របស់សហគមន៍៕ អត្ថបទ៖ ចេន សុជាតា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
