បេក្ខជនខាងក្រុមឆ្វេងនិយម គឺលោកស្រី Luisa Gonzalez កំពុងនាំមុខបន្តិចបន្តួចលើប្រធានាធិបតីក្នុងតំណែង លោក Daniel Noboa នៅក្នុងការស្ទង់មតិចំនួន ២ ដែលធ្វើឡើងនៅមុនការប្រកួតប្រជែងជុំទី ២ នៅថ្ងៃទី១៣ ខែមេសា ដើម្បីដណ្តើមតំណែងប្រធានាធិបតីអេក្វាឌ័រ បន្ទាប់ពីលោក Noboa ទទួលបានជ័យជម្នះក្នុងសំឡេងដ៏ស្ដួចស្ដើង នៅជុំទី១។

លោកស្រី Gonzalez ដែលជាអ្នកទទួលបានការលើកតម្កើងដោយអតីតប្រធានាធិបតី លោក Rafael Correa មានសំឡេងគាំទ្រ ៥១,៤ភាគរយ នៅក្នុងការស្ទង់មតិរបស់ស្ថាប័ន Negocios & Estrategias លើអ្នកបោះឆ្នោតប្រហែល ៣.០០០នាក់ ដែលត្រូវបានធ្វើឡើងនៅចន្លោះថ្ងៃទី២៤ ដល់ថ្ងៃទី២៦ ខែមីនា ដោយមានកម្រិតល្អៀង ១,៨ភាគរយ។

លោកស្រីត្រូវបានតាមពីក្រោយដោយលោក Noboa ដែលមានសំឡេងគាំទ្រ ៤៨,៦ភាគរយ ដោយធ្វើឲ្យអ្នកទាំង២ ស្ថិតក្នុងលទ្ធផលប្រទាញប្រទង់គ្នា។ ជាមួយគ្នានេះ លោកស្រី Gonzalez ក៏កំពុងនាំមុខផងដែរ នៅក្នុងការស្ទង់មតិរបស់សេដ្ឋវិទូ និងជាអ្នកស្រាវជ្រាវ គឺលោក Pedro Cango ដែលធ្វើឡើងនៅចន្លោះថ្ងៃទី២៥ ដល់ថ្ងៃទី៣០ ខែមីនា ដោយទទួលបានសំឡេង ៥១,៩ភាគរយ ធៀបនឹង ៤៨,១ភាគរយរបស់លោក Noboa។ ការស្ទង់មតិនោះបានធ្វើឡើងលើប្រជាជនអេក្វាឌ័រជាង ៥.៤០០នាក់ ហើយមានកម្រិតល្អៀង ១,៥ភាគរយ។

លោក Noboa ដែលជាអ្នកស្នងមរតកវ័យ ៣៧ឆ្នាំនៃអាជីវកម្មចេកលក្ខណៈគ្រួសារ បានចូលកាន់តំណែង នៅខែវិច្ឆិកា ឆ្នាំ២០២៣ ដើម្បីបញ្ចប់អាណត្តិមិនទាន់ផុតកំណត់របស់លោក Guillermo Lasso ដែលបានប្រកាសរំលាយសភា ដើម្បីបញ្ចៀសការបោះឆ្នោតដករូបលោកចេញពីតំណែង។

លោក Noboa បានឈ្នះលោកស្រី Gonzalez វ័យ ៤៧ឆ្នាំ ជាមួយនឹងសំឡេងតិចជាង ១ភាគរយ ពោលគឺសន្លឹកឆ្នោតក្រោម ១៧.០០០សន្លឺក នៅក្នុងការបោះឆ្នោតជ្រើសរើសប្រធានាធិបតីជុំទី១ កាលពីខែកុម្ភៈ៕