អនុរដ្ឋមន្ត្រីការបរទេសរុស្ស៊ី លោក Sergei Ryabkov ត្រូវបានដកស្រង់សម្តី នៅថ្ងៃអង្គារ (ទី១ ខែមេសា) នេះ ដែលបាននិយាយថា ការវាយប្រហារលើហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ នឹងមានផលវិបាក «ដ៏មហន្តរាយ» សម្រាប់តំបន់ដ៏ទូលំទូលាយ។

គួរបញ្ជាក់ថា ប្រធានាធិបតីអាមេរិក លោក Donald Trump បានគំរាមកាលពីថ្ងៃអាទិត្យចុងសប្ដាហ៍កន្លងមកថា នឹងទម្លាក់គ្រាប់បែកលើអ៊ីរ៉ង់ និងដាក់ពន្ធបន្ថែមជំហានទី២ លើប្រទេសនេះ ប្រសិនបើទីក្រុងតេអេរ៉ង់ មិនអាចឈានដល់កិច្ចព្រមព្រៀងជាមួយទីក្រុងវ៉ាស៊ីនតោន ជុំវិញកម្មវិធីនុយក្លេអ៊ែររបស់ខ្លួន។

ពាក់ព័ន្ធនឹងការគំរាមវាយប្រហារនេះ នៅក្នុងបទសម្ភាសន៍ជាមួយទស្សនាវដ្តីមួយដែលត្រូវបានដកស្រង់ដោយប្រព័ន្ធផ្សព្វផ្សាយរដ្ឋរបស់រុស្ស៊ី លោក Ryabkov បានថ្កោលទោសចំពោះអ្វីដែលលោកហៅថា «ឱសានវាទ» របស់លោក Trump ចំពោះប្រទេសអ៊ីរ៉ង់។ លោកបានប្រាប់ថា៖ «យើងចាត់ទុកវិធីបែបនេះ គឺជារឿងមិនសមរម្យ ហើយយើងថ្កោលទោសការធ្វើបែបនោះ»។

អ្នកការទូតជាន់ខ្ពស់រូបនេះបាននិយាយថា៖ «យើងបានព្រមានម្តងហើយម្តងទៀត និងបន្តព្រមាន ហើយប្រឆាំងដាច់ខាត សូម្បីតែជាការសន្មត ដោយពិចារណាពីលទ្ធភាពនៃការវាយប្រហារលើទីតាំងនុយក្លេអ៊ែរ និងហេដ្ឋារចនាសម្ព័ន្ធនុយក្លេអ៊ែរ (របស់អ៊ីរ៉ង់)។ ការធ្វើបែបនេះ នឹងក្លាយជាព្រឹត្តិការណ៍ដ៏មហន្តរាយ និងជាការបដិសេធទាំងស្រុង ចំពោះគោលការណ៍គ្រឹះនៃសន្ដិសុខនុយក្លេអែរ»៕