អ្នករស់រានម្នាក់ពីការរញ្ជួយដីដែលបានវាយប្រហារទីក្រុងម៉ាន់ដាឡេ សហភាពមីយ៉ាន់ម៉ា និយាយថា លោកមានអារម្មណ៍ថា ត្រូវបានបោះបង់ចោលដោយក្រុមអាជ្ញាធរ ពេលដែលលោកជាប់នៅក្រោមគំនរបាក់បែកភោជនីយដ្ឋាន ហើយនិងព្យាយាមជួយសង្រ្គោះមិត្តរួមការងាររបស់លោក ។

អ្នករស់រានម្នាក់នេះដែលសុំមិនបញ្ចេញឈ្មោះ និយាយថា លោកបានរងរបួសនៅក្នុងការរញ្ជួយដី ហើយបានជាប់ខ្លួនក្រោមគំនរបាក់បែកអគារអស់រយៈពេលជាច្រើនម៉ោងជាមួយមនុស្ស ៤នាក់ផ្សេងទៀត ដែលធ្វើការនៅទីនោះ ។

លោកនិយាយថា បុគ្គលិក ៣នាក់ បានស្លាប់នៅក្នុងការរញ្ជួយដី ហើយសាកសពមនុស្សម្នាក់ក្នុងចំណោមពួកគេ បន្តជាប់នៅក្រោមគំនរបាក់បែក ។

លោកបន្តថា លោកបានជួលគ្រឿងចក្រ ដោយប្រើប្រាស់លុយខ្លួនឯង ដើម្បីបោសសម្អាតកម្ទេចកម្ទី និងស្វែងរកសាកសពមនុស្ស ។

សង្រ្គាមស៊ីវិលនៅមីយ៉ាន់ម៉ា ជាទីដែលរបបសឹកបានរឹបអូសអំណាចនៅក្នុងរដ្ឋប្រហារកាលពីឆ្នាំ ២០២១ បានធ្វើកាន់តែស្មុគស្មាញដល់កិច្ចខិតខំជួយសង្រ្គោះ ដើម្បីទៅដល់អ្នករងរបួស និងធ្វើឲ្យពលរដ្ឋគ្មានផ្ទះសម្បែង ក្រោយការរញ្ជួយដីដ៏ខ្លាំងក្លាបំផុតក្នុងរយៈពេល ១សតវត្សរ៍កន្លងមកនេះ ។ 

កាសែត Wall Street Journal ដោយលើកឡើងពីប្រភពរបបសឹក បានរាយការណ៍ថា ចំនួនមនុស្សស្លាប់សរុបបានកើនឡើងដល់ ២.០៦៥នាក់ ក្នុងនោះមនុស្សជាង ៣.៩០០នាក់ បានរងរបួស និងមនុស្សយ៉ាងហោច ២៧០នាក់ផ្សេងទៀត កំពុងបាត់ខ្លួន ខណៈក្រុមប្រឆាំងរដ្ឋាភិបាលបង្រួបបង្រួមជាតិ រួមទាំងក្រុមសេសសល់ពីរដ្ឋាភិបាលដែលត្រូវបានផ្តួលរំលំកាលពីឆ្នាំ ២០២១ បានដាក់តួលេខមនុស្សស្លាប់ កើនឡើងដល់ ២.៤១៨នាក់ ។ សារព័ត៌មានរដ្ឋចិន រាយការណ៍ថា ជនជាតិចិន ៣នាក់ ស្ថិតនៅក្នុងចំណោមមនុស្សស្លាប់ ។

ទោះបីជាយ៉ាងណាក៏ដោយ មេដឹកនាំយោធាមីយ៉ាន់ម៉ាលោកនាយឧត្តមសេនីយ៍ Min Aung Hlaing បាននិយាយនៅក្នុងសុន្ទរកថាលើកញ្ចក់ទូរទស្សន៍នាថ្ងៃអង្គារនេះថា ចំនួនមនុស្សស្លាប់សរុប បានកើនឡើងដល់ ២.៧១៩នាក់ ហើយចំនួនស្លាប់នេះ អាចនឹងកើឡើងដល់លើស ៣ពាន់នាក់ ។ លោកថា មនុស្ស ៤.៥២១នាក់ បានរងរបួស និងមនុស្ស ៤៤១នាក់ផ្សេងទៀត កំពុងបាត់ខ្លួន ៕