នាយករដ្ឋមន្ត្រីហ្វាំងឡង់ លោក Petteri Orpo នៅថ្ងៃអង្គារ (ទី១ ខែមេសា) នេះ បាននិយាយថា ប្រទេសរបស់លោក ដែលជាសមាជិករបស់អង្គការណាតូ (NATO) គ្រោងនឹងដកខ្លួនចេញពីអនុសញ្ញាអូតាវ៉ា ដែលហាមប្រាមមិនឲ្យប្រើប្រាស់គ្រាប់មីនប្រឆាំងមនុស្ស ហើយក៏នឹងបង្កើនការចំណាយលើវិស័យការពារជាតិរបស់ខ្លួនផងដែរ នៅក្នុងប៉ុន្មានឆ្នាំខាងមុខនេះ។

ប្រទេសប៉ូឡូញ និងបណ្តាប្រទេសបាល់ទិក ដែលមានអេស្តូនី ឡាតវី និងលីទុយអានី បានឲ្យដឹងកាលពីខែមុនថា ពួកគេនឹងដកខ្លួនចេញពីអនុសញ្ញានេះ ដោយសារតែការគំរាមកំហែងផ្នែកយោធាពីប្រទេសជិតខាងរុស្ស៊ី។ ដោយការចាកចេញពីសន្ធិសញ្ញាឆ្នាំ១៩៩៧ នេះ ហ្វាំងឡង់ដែលមានព្រំដែនរួមយ៉ាងវែងបំផុតជាមួយរុស្ស៊ី ជាងប្រទេសសមាជិកអង្គការណាតូផ្សេងទៀតនោះ អាចចាប់ផ្តើមស្តុកគ្រាប់មីនម្តងទៀត ដើម្បីឲ្យវាមានរួចជាស្រេច ក្នុងករណីត្រូវការ។

យ៉ាងណាក្ដី លោក Orpo បាននិយាយថា មិនមានការគំរាមកំហែងខាងយោធាភ្លាមៗ ចំពោះប្រទេសរបស់លោកទេ ប៉ុន្តែថា រុស្ស៊ីបង្កការគំរាមកំហែងរយៈពេលវែងដល់ប្រទេសអឺរ៉ុបទាំងអស់។ លោកបានបញ្ជាក់ថា៖ «ការដកខ្លួនចេញពីអនុសញ្ញាអូតាវ៉ានេះ នឹងផ្តល់ឲ្យយើងនូវលទ្ធភាព ដើម្បីរៀបចំត្រៀមសម្រាប់ការផ្លាស់ប្តូរ នៅក្នុងបរិយាកាសសន្តិសុខ តាមវិធីដែលមានលក្ខណៈចម្រុះជាងមុន»។

ការប្រកាសនេះធ្វើឡើងនៅពេលដែលប្រធានាធិបតីអាមេរិក លោក Donald Trump កំពុងប្រឹងប្រែងបញ្ចប់សង្គ្រាម នៅអ៊ុយក្រែន ដែលបាននាំឲ្យប៉ូឡូញ និងប្រទេសបាល់ទិក មានក្ដីបារម្ភ ដែលថា រុស្ស៊ីអាចរៀបចំបំពាក់អាវុធឡើងវិញ ហើយកំណត់គោលដៅលើប្រទេសទាំងអស់នេះជំនួសវិញ។

ជាមួយគ្នានេះ លោក Orpo បានប្រាប់សន្និសីទសារព័ត៌មានមួយថា ប្រទេសហ្វាំងឡង់ នឹងបង្កើនការចំណាយលើវិស័យការពារជាតិរបស់ខ្លួនឲ្យឡើងដល់យ៉ាងហោចណាស់ ៣ភាគរយនៃផលិតផលក្នុងស្រុកសរុប (GDP) នៅឆ្នាំ២០២៩ ហើយការចំណាយនាពេលនោះ នឹងកើនឡើងប្រហែល ៣ពាន់លានអឺរ៉ូ (៣,២៤ពាន់លានដុល្លារ)៕