បឹងធម្មជាតិដ៏ស្រស់ត្រកាលធ្លាប់តែស្ងៀមស្ងាត់ Inle និងជាតំបន់ទាក់ទាញភ្ញៀវទេសចរស្ថិតនៅរដ្ឋ Shan របស់សហភាពមីយ៉ាន់ម៉ា បានប្រែកក្លាយជាបឹងខ្ទេចខ្ទី ក្រោយរងការវាយប្រហារពីគ្រោះរញ្ជួយដីកម្រិត ៧,៧រ៉ិចទ័រ ធ្វើឲ្យផ្ទះឈើ និងផ្ទះឫស្សីប្រពៃណី ធ្លាក់ចូលបឹងគ្មានសេសសល់ ។

រូបភាពវីដេអូឃ្លីបក្រោយការរញ្ជួយដី ឃើញផ្ទះផ្អៀងចូលបឹង ខណៈរចនាសម្ព័ន្ធជាច្រើនលិចចូលក្នុងទឹកបឹងដោយអន្លើរ ។

ការរញ្ជួយដីដែលបានវាយប្រហារសហភាពមីយ៉ាន់នៅពេលបាយថ្ងៃត្រង់កាលពីថ្ងៃសុក្រសប្តាហ៍មុន និងជាការរញ្ជួយដីដ៏ខ្លាំងក្លាបំផុតវាយប្រហារមីយ៉ាន់ម៉ា ក្នុងរយៈពេលជាង ១សតវត្សរ៍កន្លងមកនេះ បានធ្វើឲ្យខូចខាតហេដ្ឋារចនាសម្ព័ន្ធជាច្រើន រួមទាំងស្ពាន ផ្លូវហាយវ៉ា អាកាសយានដ្ឋាន និងផ្លូវរថភ្លើង ក៏ដូចជារារាំងកិច្ចខិតខំជួយសង្រ្គោះ ស្របពេលដែលសង្រ្គាមស៊ីវិល នៅតែអូសបន្លាយពេលនៅប្រទេសអាស៊ីអាគ្នេយ៍មួយនេះ ។

ទូរទស្សន៍រដ្ឋ MRTV រាយការណ៍ថា ចំនួនមនុស្សស្លាប់ដោយសារការរញ្ជួយដីនៅមីយ៉ាន់ម៉ា បានកើនឡើងដល់ ២.០៦៥នាក់ ក្នុងនោះមនុស្សជាង ៣.៩០០នាក់ បានរងរបួស និងមនុស្សយ៉ាងហោច ២៧០នាក់ផ្សេងទៀត កំពុងបាត់ខ្លួន ៕