យោធារបស់ប្រទេសចិននៅថ្ងៃពុធទី២មេសា សប្ដាហ៍នេះ នៅតែបន្តសមយុទ្ធយោធា ដែលមានឈ្មោះថា "Strait Thunder-2025A" នៅតំបន់កណ្តាល និងភាគខាងត្បូងនៃច្រកសមុទ្រតៃវ៉ាន់ បន្ទាប់ពីបានចាប់ផ្ដើមកាលពីថ្ងៃអង្គារ និងហៅមេដឹកនាំកោះនេះលោក ឡៃ ឆីង-ទ័រ ថាជាប៉ារ៉ាស៊ីត។សកម្មភាពយោធាជាថ្មីរបស់ចិន ធ្វើឡើងស្ទើរគ្រប់ទិសជុំវិញកោះតៃវ៉ាន់ ដែលគេមើលឃើញថាជាការសាកល្បងដំណោះស្រាយរបស់អាមេរិក។

យោធាបាននិយាយនៅក្នុងសេចក្តីថ្លែងការណ៍មួយថា "សមយុទ្ធនេះផ្តោតលើប្រធានបទនៃការកំណត់អត្តសញ្ញាណ និងការផ្ទៀងផ្ទាត់ ការព្រមាន និងការបណ្តេញចេញ ការស្ទាក់ចាប់ និងការឃុំឃាំង ដើម្បីសាកល្បងសមត្ថភាពរបស់កងទ័ពក្នុងការគ្រប់គ្រងតំបន់ ការទប់ស្កាត់ ការត្រួតពិនិត្យរួមគ្នា និងការវាយប្រហារចំគោលដៅសំខាន់ៗ ។

យោធាចិនបាននិយាយកាលពីថ្ងៃអង្គារសប្ដាហ៍នេះថា ខ្លួនបានចាប់ផ្តើមសមយុទ្ធរួម ដោយមានការចូលរួមពី កងទ័ពរបស់ខ្លួន កងទ័ពជើងទឹក ទ័ពអាកាស និងកងកម្លាំងរ៉ូកែតជុំវិញកោះតៃវ៉ាន់ ជា "ការព្រមានយ៉ាងម៉ឺងម៉ាត់" ប៉ុន្មានថ្ងៃបន្ទាប់ពីប្រមុខការពារជាតិអាមេរិកលោក Pete Hegseth បានប្តេជ្ញាប្រឆាំងនឹង "សកម្មភាពរបស់ចិន" ក្នុងដំណើរទស្សនកិច្ចលើកដំបូងទៅកាន់អាស៊ី។

សមយុទ្ធយោធាចុងក្រោយរបស់ចិនកើតឡើង ខណៈកោះតៃវ៉ាន់ កំពុងសម្លឹងមើលដោយភ័យខ្លាច នៅពេលប្រធានាធិបតីអាមេរិក Donald Trump ផ្លាស់ប្តូរទំនាក់ទំនងជាសកលរបស់ទីក្រុងវ៉ាស៊ីនតោនជាមួយគោលនយោបាយការបរទេសយកអាមេរិកជាធំ"America First" របស់លោក ដោយបោះបង់ការធានាដែលមានអាយុកាលរាប់ទសវត្សរ៍ចំពោះអឺរ៉ុប និងជំរុញឱ្យសម្ព័ន្ធមិត្ត និងដៃគូអាស៊ីជាច្រើនឆ្នាំណាស់មកហើយឱ្យបង់ប្រាក់ធានាបន្ថែមទៀដើម្បីទទួលបានការការពារពីសហរដ្ឋអាមេរិក។ កោះតៃវ៉ាន់ ដែលមានប្រជាជនប្រមាណ២៣លាននាក់ ស្ថិតនៅចម្ងាយត្រឹមតែ ៨០ ម៉ាយពីប្រទេសចិន។សមយុទ្ធនេះ គឺជាការរំលឹកចុងក្រោយនៃការគំរាមកំហែងរបស់ចិន ដែលតែងតែអះអាងសិទ្ធិគ្រប់គ្រងលើកោះនេះ ហើយបានប្តេជ្ញាវាយក្រសោបយកដោយកម្លាំងបើចាំបាច់៕