ប្រធានាធិបតីអ៊ុយក្រែន លោក Volodymyr Zelenskiy នឹងជួបប្រជុំនៅថ្ងៃសុក្រ ទី៤ ខែមេសាខាងមុខនេះ ជាមួយអ្នកតំណាងមកពីប្រទេសមួយចំនួន ដែលត្រៀមកងទ័ពសម្រាប់រួមចំណែកក្នុងកងទ័ពបរទេសនៅក្នុងប្រទេសអ៊ុយក្រែន។

ខណៈទីក្រុង Kyiv កំពុងជំរុញឱ្យមានការធានាបានសន្តិសុខ ជាផ្នែកនៃកិច្ចព្រមព្រៀងសន្តិភាពណាមួយនោះ មេដឹកនាំអ៊ុយក្រែនបាននិយាយថា លោកនឹងពិភាក្សាជាមួយសម្ព័ន្ធមិត្តរបស់ទីក្រុង Kyiv អំពីការត្រៀមខ្លួនរបស់ពួកគេក្នុងការរួមចំណែកដល់កម្លាំងជើងគោក សមុទ្រ និងដែនអាកាស ជាគំនិតផ្តួចផ្តើមមួយ ដែលប្រទេសរុស្ស៊ីប្រឆាំងយ៉ាងខ្លាំង។

ថ្លែងនៅក្នុងសន្និសីទសារព័ត៌មានជាមួយរដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock លោក Zelenskiy បានជំរុញឱ្យសហរដ្ឋអាមេរិក «ពង្រឹងសម្ពាធទណ្ឌកម្មលើប្រទេសរុស្ស៊ី» ។

លោកនិយាយថា អ៊ុយក្រែន បញ្ជូនព័ត៌មានទៅឲ្យសហរដ្ឋអាមេរិក «ស្ទើរតែរាល់ថ្ងៃ» អំពីប្រទេសរុស្ស៊ី ដែលបានបំពានបទឈប់បាញ់លើផ្នែកថាមពល។