អ្នកការទូតជាន់ខ្ពស់រុស្ស៊ីមួយរូបបាននិយាយថា ទីក្រុងមូស្គូមិនអាចទទួលយកសំណើរបស់សហរដ្ឋអាមេរិក ដើម្បីបញ្ចប់សង្គ្រាមនៅអ៊ុយក្រែន "ក្នុងទម្រង់បច្ចុប្បន្ន" បានទេ ដោយសារតែសំណើនោះមិនបានដោះស្រាយបញ្ហាដែលរុស្ស៊ីចាត់ទុកថាជារឹសគល់បង្កឱ្យមានជម្លោះ ខណៈបង្ហើបថា កិច្ចចរចារវាងអាមេរិក និងរុស្ស៊ី លើប្រធានបទនេះត្រូវជាប់គាំង។

អនុរដ្ឋមន្ត្រីការបរទេស និងជាអ្នកឯកទេសខាងទំនាក់ទំនងអាមេរិក-រុស្ស៊ី លោក Sergei Ryabkov បានលើកឡើងថា ទីក្រុងមូស្គូ និងទីក្រុងវ៉ាស៊ីនតោន រហូតមកដល់ពេលនេះ មិនអាចតភ្ជាប់ការខ្វែងគំនិតគ្នា ដែលលោកប្រធានាធិបតី Vladimir Putin បានលើកឡើងកាលពីជាងពីរសប្តាហ៍មុននោះទេ ដែលថា សំណើរបស់អាមេរិក ត្រូវការកែតម្រូវឡើងវិញ។

លោកនិយាយថា “ទីក្រុងមូស្គូ មិនទាន់អាចឈានទៅមុខជាមួយនឹងកិច្ចព្រមព្រៀងទេ ដោយសារ "មិនទាន់មានចំណុចបំពេញតាមតម្រូវការចម្បងរបស់រុស្ស៊ីនៅឡើយ ពោលគឺការដោះស្រាយបញ្ហាឫសគល់នៃជម្លោះ"។

គួរឱ្យដឹងថា លោក Putin ចង់ឱ្យអ៊ុយក្រែន ទម្លាក់មហិច្ឆតារបស់ខ្លួនក្នុងការចូលរួមជាមួយអង្គការណាតូ ហើយឱ្យរុស្ស៊ីគ្រប់គ្រងតំបន់អ៊ុយក្រែនទាំងមូលដែលខ្លួនបានវាយយក ព្រមទាំងទំហំមានកម្រិតនៃកងទ័ពអ៊ុយក្រែន។ ប៉ុន្តែទីក្រុងគីវនិយាយថា ការទាមទារទាំងនោះមានន័យធៀបនឹងការទាមទារឱ្យអ៊ុយក្រែនចុះចាញ់។

ជំហានថយក្រោយនេះកើតមាននៅពេលលោកប្រធានាធិបតីអាមេរិក Donald Trump ហាក់ដូចជាអស់ការអត់ធ្មត់កាន់តែខ្លាំងជាមួយនឹងអ្វីដែលលោកហៅថា អាចជាការអូសបន្លាយលើកិច្ចព្រមព្រៀងទូលំទូលាយដោយទីក្រុងមូស្គូ។ លោក Trump ក្នុងប៉ុន្មានថ្ងៃថ្មីៗនេះនិយាយថា លោក "ខឹង" ជាមួយលោក Putin ហើយលើកពីការដាក់ទណ្ឌកម្មលើបណ្ដាប្រទេសដែលទិញប្រេងពីរុស្ស៊ី ប្រសិនបើលោកគិតថា ទីក្រុងមូស្គូកំពុងរារាំងកិច្ចព្រមព្រៀង៕