អ្នកទេសចរអឺរ៉ុប ចូលទៅកាន់ចក្រភពអង់គ្លេសនឹងត្រូវទិញលិខិតអនុញ្ញាតតាមប្រព័ន្ធអេឡិចត្រូនិកជាមុនសម្រាប់ការធ្វើដំណើរចាប់ពីថ្ងៃពុធ ទី២ ខែមេសានេះ ខណៈរដ្ឋាភិបាលអង់គ្លេសធ្វើតាមប្រទេសផ្សេងៗទៀតក្នុងការព្យាយាមពង្រឹងសន្តិសុខអន្តោប្រវេសន៍ ដោយការពិនិត្យមើលមនុស្ស មុនពេលពួកគេឆ្លងកាត់ចូលព្រំដែនរបស់ខ្លួន។

គម្រោងការអនុញ្ញាតការធ្វើដំណើរតាមប្រព័ន្ធអេឡិចត្រូនិក (ETA) តម្រូវឱ្យភ្ញៀវទាំងអស់ដែលមិនត្រូវការទិដ្ឋាការចូលចក្រភពអង់គ្លេស ត្រូវទិញការអនុញ្ញាតមុនការធ្វើដំណើរតាមប្រព័ន្ធអនឡាញក្នុងតម្លៃ ១០ផោន (១២ អឺរ៉ូ) ដែលតម្លៃនឹងកើនឡើងដល់១៦ ផោន ចាប់ពីថ្ងៃទី៩ ខែមេសា។

រដ្ឋមន្ត្រីទេសន្តរប្រវេសន៍ លោក Seema Malhotra បាននិយាយថា «ការពង្រីកការអនុញ្ញាតការធ្វើដំណើរតាមប្រព័ន្ធអេឡិចត្រូនិក(ETA)ទូទាំងពិភពលោក ភ្ជាប់ទៅនឹងការប្តេជ្ញាចិត្តរបស់យើងក្នុងការពង្រឹងសន្តិសុខតាមរយៈបច្ចេកវិទ្យា និងនវានុវត្តន៍។

ការិយាល័យផ្ទៃក្នុងរបស់ចក្រភពអង់គ្លេស ឬក្រសួងមហាផ្ទៃ បាននិយាយថា ការដាក់ពាក្យស្នើសុំការអនុញ្ញាតការធ្វើដំណើរតាមប្រព័ន្ធអេឡិចត្រូនិក(ETA) នឹងមានលក្ខណៈសាមញ្ញតាមរយៈកម្មវិធី ETA របស់ចក្រភពអង់គ្លេស ដោយអ្នកដាក់ពាក្យភាគច្រើនទទួលបានការសម្រេចដោយស្វ័យប្រវត្តិក្នុងរយៈពេលតែប៉ុន្មាននាទីប៉ុណ្ណោះ។ អ្នកដាក់ពាក្យសុំ ត្រូវផ្តល់រូបថត និងព័ត៌មានលម្អិតអំពីជីវប្រវត្តិ ហើយឆ្លើយសំណួរអំពីភាពត្រឹមត្រូវ និងឧក្រិដ្ឋកម្ម។