រដ្ឋមន្ត្រីក្រសួងការពារជាតិ លោកស្រី Margarita Robles បាននិយាយកាលពីថ្ងៃអង្គារថា ប្រទេសអេស្ប៉ាញនឹងបង្កើនការចំណាយលើវិស័យការពារជាតិរបស់ខ្លួនដល់ ២% នៃផលិតផលក្នុងស្រុកសរុប យ៉ាងល្អប្រសើរនៅមុនកាលបរិច្ឆេទគោលដៅដើមឆ្នាំ២០២៩ ប៉ុន្តែនៅមិនទាន់កំណត់ពេលវេលាផុតកំណត់ជាក់លាក់ណាមួយថ្មីនោះទេ។

ប្រទេសអេស្ប៉ាញ មានការចំណាយលើវិស័យការពារជាតិទាបបំផុត ដែលជាចំណែកនៃសេដ្ឋកិច្ចរបស់ខ្លួនគឺត្រឹមតែ ១,៣% ប៉ុណ្ណោះក្នុងចំណោមសមាជិកសម្ព័ន្ធយោធាណាតូ។

ការឈានដល់២% នឹងត្រូវការប្រហែល ១០ពាន់លានអឺរ៉ូបន្ថែមទៀត ឬ១០,៧៩ ពាន់លានដុល្លារ ក្នុងមួយឆ្នាំ។

កាលពីសប្តាហ៍មុន អគ្គលេខាធិការសម្ព័ន្ធយោធាណាតូ លោក Mark Rutte បាននិយាយនៅក្នុងសុន្ទរកថាក្នុងទីក្រុងវ៉ាសាវី ថា អេស្បាញ ពេលនេះកំពុងរំពឹងថានឹងបំពេញគោលដៅ ២% របស់ប្លុក នៅរដូវក្ដៅ ដែលនាំឱ្យរដ្ឋាភិបាលអេស្ប៉ាញនិយាយទៅកាន់ លោក Rutte ដើម្បីពន្យល់ថា ខ្លួននឹងប្រឹងប្រែងឱ្យអស់ពីសមត្ថភាពដើម្បីខិតទៅជិតដល់គោលដៅនៅពេលនោះ ។

លោកស្រី Robles បាននិយាយនៅក្រៅព្រឹត្តិការណ៍មួយនៅទីក្រុង Lisbon ថា «វាពុំមែនជាបញ្ហាច្រើនទេ ចំពោះពេលវេលាកំណត់ ប៉ុន្តែខ្ញុំជឿថា ជាការប្រសើរនៅមុនឆ្នាំ២០២៩ យើងនឹងបំពេញកាតព្វកិច្ចរបស់យើង យើងនឹងធ្វើការលើបញ្ហានេះយ៉ាងម៉ឺងម៉ាត់»។

នាយករដ្ឋមន្ត្រី លោក Pedro Sanchez បានធានាដល់សម្ព័ន្ធមិត្ត ថា អេស្បាញ នឹងដើរតួក្នុងកិច្ចខិតខំប្រឹងប្រែងរបស់អឺរ៉ុបក្នុងការពង្រឹងការការពារខ្លួន ប៉ុន្តែលោកក៏បានបញ្ជាក់ថាប្រទេសដែលនៅឆ្ងាយពីប្រទេសរុស្ស៊ីតាមភូមិសាស្រ្ត គួរតែផ្តោតលើការចំណាយរបស់ពួកគេប្រឆាំងការវាយប្រហារតាមអ៊ីនធឺណិត ជាជាងការស្តុកទុកអាវុធ។