ប្រព័ន្ធផ្សព្វផ្សាយរដ្ឋបាននិយាយនៅថ្ងៃពុធ (០២ មេសា) នេះថា កូរ៉េខាងជើង រិះគន់កិច្ចព្រមព្រៀងនាពេលថ្មីៗនេះដោយរវាងសហរដ្ឋអាមេរិក និងជប៉ុន ស្តីពីការសហការផលិតមីស៊ីលបាញ់ពីអាកាសទៅអាកាស ថាជាការបង្កហានិភ័យសន្តិសុខក្នុងតំបន់កាន់តែធ្ងន់ធ្ងរ និងជាឧទាហរណ៍មួយទៀតនៃការជំរុញរបស់ទីក្រុងវ៉ាស៊ីនតោន ក្នុងការធ្វើយោធាលើជប៉ុន។

ទីភ្នាក់ងារសារព័ត៌មានរដ្ឋ KCNA និយាយថា នៅពេលដែលសហរដ្ឋអាមេរិក កំពុងធ្វើឱ្យប្រសើរឡើងនូវបញ្ជាការយោធារបស់ខ្លួននៅជប៉ុន កិច្ចសហប្រតិបត្តិការរបស់ប្រទេសទាំងពីរក្នុងការផលិតអាវុធយុទ្ធភ័ណ្ឌ ច្បាស់ណាស់មានចេតនាយោធា និងឈ្លានពានសំដៅទៅលើប្រទេសក្នុងតំបន់។

ការអត្ថាធិប្បាយរបស់មន្រ្តីកូរ៉េខាងជើងរូបនេះសំដៅដល់ប្រព័ន្ធមីស៊ីលបាញ់ពីអាកាសទៅអាកាស AIM-120 ដែលអាមេរិក និងជប៉ុន បានព្រមព្រៀងគ្នាពន្លឿនការផលិត ក្នុងអំឡុងពេលដំណើរទស្សនកិច្ចរបស់រដ្ឋមន្ត្រីការពារជាតិអាមេរិក លោក Pete Hegseth ទៅកាន់ទីក្រុងតូក្យូ កាលពីថ្ងៃអាទិត្យចុងសប្ដាហ៍មុន។

មន្ត្រីទីក្រុងព្យុងយ៉ាងរូបនេះបាននិយាយថា ការជំរុញលើការដាក់ពង្រាយអាវុធបែបនេះ ដែលប្រើប្រាស់ដោយយន្តហោះចូលរួមក្នុងសមយុទ្ធយោធាជាញឹកញាប់នៅក្នុងតំបន់ ហើយបានបង្កការគំរាមកំហែងដល់សន្តិសុខយ៉ាងធ្ងន់ធ្ងររួចទៅហើយនោះ ពេលនេះបានបន្ថែមនូវ "ធាតុថ្មីនៃអស្ថិរភាពជាយុទ្ធសាស្ត្រដល់តំបន់អាស៊ីប៉ាស៊ីហ្វិក"៕