យោងតាមរបាយការណ៍ដែលបានចេញផ្សាយកាលពីថ្ងៃចន្ទបានឲ្យដឹងថា អសន្តិសុខស្បៀងកាន់តែធ្ងន់ធ្ងរទៅៗនៅក្នុងតំបន់ជាច្រើនរបស់ប្រទេសសូម៉ាលី ដោយតំបន់ចំនួន១៨ កំពុងជួបប្រទះការកើនឡើងប្រជាជនប្រឈមវិបត្តិស្បៀងអាហារ ។

អង្គការវិភាគការបែងចែកដំណាក់កាលសន្តិសុខស្បៀងចម្រុះ (IPC) បាននិយាយថា ប្រជាជនជិត៤,៦លាននាក់នៅក្នុងប្រទេសសូម៉ាលី ទំនងជានឹងជួបប្រទះកម្រិតខ្ពស់នៃអសន្តិសុខស្បៀងធ្ងន់ធ្ងរ នៅចន្លោះខែមេសា ដល់ខែមិថុនា។

របាយការណ៍បាននិយាយថា កត្តាជំរុញសំខាន់ៗសម្រាប់ស្ថានភាពសន្តិសុខស្បៀងកាន់តែយ៉ាប់យ៉ឺនក្នុងអំឡុងពេលនៃការព្យាករណ៍ រួមមាន ភ្លៀងធ្លាក់ក្រោមកម្រិតមធ្យមនៃរដូវកាលចន្លោះពីខែមេសា ដល់ខែមិថុនា តម្លៃអាហារលើសពីកម្រិមធ្យម ជម្លោះដែលនៅតែបន្ត អសន្តិសុខ និងទឹកជំនន់ក្នុងតំបន់។

របាយការណ៍និយាយថា អសន្តិសុខស្បៀងកាន់តែអាក្រក់នៅក្នុងប្រទេសសូម៉ាលី បង្ហាញពីផលប៉ះពាល់នៃជំនួយមនុស្សធម៌ដែលត្រូវបានកាត់បន្ថយ និងប្រជាជនភៀសខ្លួនកើនឡើង ។

យោងតាមការប៉ាន់ប្រមាណរបស់អង្គការទេសន្តប្រវេសន៍អន្តរជាតិ និងក្រុមប្រឹក្សាជនភៀសខ្លួនដាណឺម៉ាក បានឲ្យដឹងថា ប្រទេសសូម៉ាលី នឹងមើលឃើញការកើនឡើងជនភៀសខ្លួននៅខាងក្នុងប្រទេស ចំនួន ២៣០.៥៩៥នាក់ ចន្លោះពីខែមេសាដល់ខែមិថុនា ភាគច្រើនដោយសារតែជម្លោះ និងការភៀសខ្លួនទាក់ទងនឹងគ្រោះរាំងស្ងួត។