ទីផ្សារ នៅទូទាំងពិភពលោក មានការប្រែប្រួល កាលពីថ្ងៃអង្គារ (ទី១ ខែមេសា) ខណៈដែលអ្នកវិនិយោគបានត្រៀមខ្លួន សម្រាប់ការប្រកាសពន្ធ «ថ្ងៃរំដោះ« របស់ប្រធានាធិបតីអាមេរិក លោក Donald Trump ដោយសង្ឃឹមថា ពួកគេនឹងមិនរងប៉ះពាល់ដល់អាជីវកម្ម ដោយភាពមិនប្រាកដប្រជានៃគោលនយោបាយពាណិជ្ជកម្ម ដែលបានបង្កបញ្ហាដល់ទីផ្សារជាច្រើនសប្តាហ៍មកហើយ។ 

លោក Trump គ្រោងនឹងបង្ហាញ «ពន្ធបដិការ» ដោយតម្រឹមកាតព្វកិច្ចរបស់សហរដ្ឋអាមេរិកជាមួយប្រទេសដទៃទៀត នៅរសៀលថ្ងៃពុធ (ទី២ ខែមេសា) នេះ ក្នុងព្រឹត្តិការណ៍មួយ នៅឯសេតវិមាន Rose Garden។ មេដឹកនាំអាមេរិករូបនេះ កាលពីថ្ងៃអាទិត្យចុងសប្ដាហ៍កន្លងមក បាននិយាយថា ការយកពន្ធ នឹងរួមបញ្ចូលប្រទេសទាំងអស់ ប៉ុន្តែព័ត៌មានលម្អិតជាក់លាក់ ផ្ដល់ឲ្យតិចតួចប៉ុណ្ណោះ។ លោកបានដាក់ពន្ធលើការនាំចូលជាច្រើនរួចហើយ លើប្រទេសចិន កាណាដា និងម៉ិកស៊ិក ហើយលោកបានត្រៀមដាក់ចេញពន្ធលើរថយន្ត នៅសប្តាហ៍នេះ។

យោងតាមរបាយការណ៍របស់សារព័ត៌មាន The Washington Post បានឲ្យដឹងថា ជំនួយការសេតវិមានបានព្រាងសំណើ ដើម្បីដំឡើងពន្ធប្រហែល ២០ភាគរយលើការនាំចូលភាគច្រើនទៅកាន់សហរដ្ឋអាមេរិក។ អ្នកនាំពាក្យសេតវិមាន លោកស្រី Karoline Leavitt បាននិយាយថា ពន្ធបដិការលើប្រទេសដែលដាក់ពន្ធលើទំនិញអាមេរិក នឹងចូលជាធរមានភ្លាមៗ បន្ទាប់ពីលោក Trump ប្រកាសពីវិធានការនេះ ខណៈដែលពន្ធ ២៥ភាគរយលើការនាំចូលរថយន្ត នឹងចូលជាធរមាននៅថ្ងៃព្រហស្បតិ៍។

ភាគហ៊ុនសកល នៅតែមិននឹងនរ មុនមាននូវចំណាត់ការដែលរដ្ឋបាលរបស់លោក Trump ហៅថា «ពន្ធបដិការ» ដោយលោកមហាសេដ្ឋីទៅពីបក្សសាធារណរដ្ឋ បាននិយាយថា ចាំបាច់តម្រូវឲ្យមាន ដើម្បីប្រយុទ្ធប្រឆាំងនឹងអតុល្យភាពពាណិជ្ជកម្មមិនយុត្តិធម៌ជាមួយបណ្តាប្រទេស ដែលកំណត់គោលដៅលើសហរដ្ឋអាមេរិក។ នៅសហរដ្ឋអាមេរិក ទីផ្សារភាគហ៊ុនបានហក់ឡើងបន្តិច អំឡុងការជួញដូរ ក្នុងពេលវេលាដ៏ច្របូកច្របល់នេះ កាលពីថ្ងៃអង្គារ ខណៈដែលតម្លៃមាស បានឡើងដល់កម្រិតខ្ពស់បំផុត៕