នាយករដ្ឋមន្ត្រីអូស្ត្រាលី លោក Anthony Albanese ក៏ដូចជាគូប្រជែងរបស់លោក នៅក្នុងការបោះឆ្នោតខែឧសភា គឺប្រធានគណបក្សសេរីនិយម លោក Peter Dutton សុទ្ធតែបាននិយាយដូចគ្នាថា ពួកលោកនឹងក្រោកឈរការពារផលប្រយោជន៍ជាតិរបស់ប្រទេស នៅចំពោះមុខការដំឡើងពន្ធរបស់សហរដ្ឋអាមេរិក ដែលអាចប៉ះពាល់ដល់អាជីវកម្មសាច់គោអូស្ត្រាលី។

គួរបញ្ជាក់ថា អូស្ត្រាលីមានអតិរេកពាណិជ្ជកម្មជាមួយសហរដ្ឋអាមេរិក និងកិច្ចព្រមព្រៀងពាណិជ្ជកម្មសេរីដែលអនុញ្ញាតឲ្យមានការនាំចូលទំនិញដោយមិនបង់ពន្ធ សម្រាប់ការនាំចេញរបស់សហរដ្ឋអាមេរិក។ លោក Albanese បាននិយាយថា រដ្ឋាភិបាលរបស់លោក នឹងមិនសងសឹក ចំពោះរដ្ឋបាលរបស់លោក Donald Trump ដោយពន្ធបដិការនោះឡើយ។

ដោយនិយាយយ៉ាងម៉ឺងម៉ាត់ អំឡុងយុទ្ធនាការបោះឆ្នោត លោក Albanese នៅថ្ងៃពុធ (ទី២ ខែមេសា) នេះ បានបញ្ជាក់យ៉ាងច្បាស់ៗថា លោកនឹង «ក្រោកឈរការពារផលប្រយោជន៍អូស្ត្រាលី« ហើយនឹងមិនសម្រួលបទប្បញ្ញត្តិរបស់អូស្ត្រាលីដែលទំនងជាត្រូវបានកំណត់គោលដៅដោយសហរដ្ឋអាមេរិកនោះទេ។

លោក Albanese បានប្រាប់ថា លោក «នឹងមិនសម្របសម្រួល» លើវិស័យសំខាន់ៗចំនួន៣ ដែលទំនងជាត្រូវបានកំណត់គោលដៅ បន្ទាប់ពីវិស័យទាំងនោះមាននៅក្នុងរបាយការណ៍ ស្តីពីរបាំងពាណិជ្ជកម្មបរទេសដែលចេញផ្សាយមួយថ្ងៃមុននេះ ដោយតំណាងពាណិជ្ជកម្មសហរដ្ឋអាមេរិក (USTR)៕

អូស្ត្រាលី និងសហរដ្ឋអាមេរិកស្ថិតក្នុងចំណោមប្រទេសនាំចេញសាច់គោធំជាងគេបំផុតរបស់ពិភពលោក ហើយការធ្លាក់ចុះនាពេលថ្មីៗនេះ នៅក្នុងផលិតកម្មសាច់គោរបស់អាមេរិក បានផ្ដល់ឱកាសឲ្យអូស្ត្រាលីនាំចេញសាច់ក្នុងបរិមាណដ៏ច្រើន កាលពីឆ្នាំមុន ដោយបង្កើនចំណែកទីផ្សារ នៅអាមេរិកខាងជើង និងអាស៊ី ហើយផ្តល់ប្រាក់ចំណេញរាប់ពាន់លានដុល្លារដល់អ្នកកែច្នៃសាច់គោ និងកសិករ៕