អ្នកជួយសង្គ្រោះម្នាក់ កាលពីថ្ងៃអង្គារ (ទី១ ខែមេសា) បាននិយាយថា ម៉ាស៊ីនស្កេន បានរកឃើញរាងកាយមនុស្សជាង ៧០នាក់ នៅក្រោមគំនរបាក់បែកកណ្តាលអគារកម្ពស់ ៣០ជាន់ដែលបានបាក់រលំ នៅក្នុងសង្កាត់ Chatuchak (ចតុច័ក) ទីក្រុងបាងកក ប្រទេសថៃ។

លោក Bin Bunluerit (ប៊ីន ប៊ុនឡឺតរ៉ីត) តារាសម្តែង និងជាមន្ត្រីនៃមូលនិធិ Ruamkatanyu (មូលនិធិរួមកត្តញ្ញូ) បាននិយាយថា ការស្កេន កាលពីព្រឹកថ្ងៃទី១ ខែមេសា បានរកឃើញរាងកាយមនុស្សជាង ៧០នាក់ ឬអាចជាសពដែលជាប់នៅក្រោមគំនរបែកបាក់របស់អគារនោះ។

តែយ៉ាងណាក្ដី លោកបានកត់សម្គាល់ថា រូបភាពដែលបានស្កេននោះ មិនអាចកំណត់បានថា តើសព ឬមនុស្សដែលស្ថិតក្រោមគំនរបាក់បែកនោះ មានចម្ងាយប៉ុន្មានម៉ែត្រនោះទេ។ ទោះបីជាអគារនេះមានសភាពខ្ទេចខ្ទីយ៉ាងណាក៏ដោយ ក៏ក្រុមអ្នកជួយសង្គ្រោះ នៅតែមានក្តីសង្ឃឹមអាចរកឃើញអ្នកនៅរស់រានមានជីវិត ក្នុងចំណោមរាងកាយមនុស្សដែលត្រូវបានប្រទះឃើញដោយម៉ាស៊ីនស្កេននោះ។

សពជាច្រើនត្រូវបានរកឃើញ បន្ទាប់ពីក្រុមអ្នកជួយសង្គ្រោះបានចាប់ផ្តើមប្រើគ្រឿងចក្រធុនធ្ងន់ ដើម្បីកាយបេតុងចេញពីគំនរបាក់បែក។ ទន្ទឹមនឹងនេះដែរ ក្រុមផ្សេងទៀត បានប្រើប្រាស់ម៉ាស៊ីនខួង ដើម្បីទៅដល់កន្លែងអ្នករងគ្រោះ និងទាញយកអ្នកដែលជាប់នៅខាងក្រោមនោះ។

សូមបញ្ជាក់ថា អគារការិយាល័យសវនកម្មរដ្ឋដែលកំពុងដំណើរការការសាងសង់ (SAO) បានបាក់រលំកាលពីរសៀលថ្ងៃសុក្រសប្ដាហ៍កន្លងទៅ បន្ទាប់ពីរងប៉ះពាល់ដោយសារការរញ្ជួយដីកម្រិត ៨,២រិចទ័រ នៅជិតទីក្រុង Mandalay របស់សហភាពមីយ៉ាន់ម៉ា ដែលមានចម្ងាយប្រហែល ៣៩២គីឡូម៉ែត្រ ពីខេត្ត Mae Hong Son (ម៉ែហងសន) របស់ប្រទេសថៃ។ ជាមួយនឹងការរកឃើញសពជនរងគ្រោះម្នាក់ កាលពីថ្ងៃទី៣១ ខែមីនា ចំនួនអ្នកស្លាប់ដែលត្រូវបានបញ្ជាក់ បានកើនឡើងដល់ ១៤នាក់ហើយ ខណៈដែលមនុស្ស ៩នាក់បានរងរបួស ហើយ ៧២នាក់ទៀត កំពុងបាត់ខ្លួន៕