រដ្ឋាភិបាលអាហ្រ្វិកខាងត្បូង បាននិយាយកាលពីថ្ងៃអង្គារថា អ្នកការទូតជាន់ខ្ពស់អាហ្រ្វិកខាងត្បូង បានជួបសមភាគីអាមេរិករបស់ពួកគេ ក្នុងទីក្រុងវ៉ាស៊ីនតោន ដើម្បីបញ្ជាក់ឲ្យច្បាស់អំពី «ការយល់ច្រឡំ» ដែលបានធ្វើឲ្យប៉ះពាល់ដល់ទំនាក់ទំនងយ៉ាងធ្ងន់ធ្ងរ ចាប់តាំងពីលោកប្រធានាធិបតី ដូណាល់ ត្រាំ ( Donald Trump) ចូលកាន់តំណែង។

ក្រសួងការបរទេសអាហ្វ្រិកខាងត្បូង បានបញ្ជាក់ថា កិច្ចប្រជុំនេះ មានគោលបំណងពន្យល់ពីគោលនយោបាយរបស់ប្រទេសនេះ ដូច្នេះរដ្ឋបាលរបស់លោក ត្រាំ គួរតែ«កំណត់ជំហរខ្លួនឯង ជាដៃគូយុទ្ធសាស្ត្រ»។

រដ្ឋាភិបាលថ្មីរបស់សហរដ្ឋអាមេរិក បានចាប់ផ្តើមបង្កើតគោលនយោបាយជាច្រើន នៅក្នុងអាហ្វ្រិកខាងត្បូង ដោយបានឈានដល់ការបណ្តេញឯកអគ្គរដ្ឋទូតរបស់ទីក្រុង Pretoria លោក Ebrahim Rasool កាលពីខែមុន។

លោក ត្រាំ ក៏បានកាត់បន្ថយជំនួយហិរញ្ញវត្ថុផងដែរ លើអ្វីដែលលោកបានចោទប្រកាន់ថា ជាគោលនយោបាយប្រឆាំងនឹងម្ចាស់ដីជនជាតិស្បែកស និងបានផ្តល់ការតាំងទីលំនៅជនភៀសខ្លួន ដល់ជនជាតិភាគតិច Afrikaner ស្បែកស ដែលលោកបានអះអាងថា កំពុងត្រូវបានគេធ្វើទុក្ខបុកម្នេញ។

ក្រសួងបាននិយាយនៅក្នុងសេចក្តីថ្លែងការណ៍មួយថា៖«គណៈប្រតិភូបានបំភ្លឺបញ្ហាសំខាន់ៗ និងការយល់ខុសនានា ដែលបានកើតឡើងនោះ។