ប្រធានាធិបតីនៃសាធារណរដ្ឋអារ៉ាប់ស៊ីរី លោក Ahmad Al-Sharaa បានសង្កត់ធ្ងន់ពីសារៈសំខាន់នៃការចាប់ផ្តើមសករាជថ្មី ក្នុងទំនាក់ទំនងរបស់ប្រទេសលោក ជាមួយនឹងប្រទេសអ៊ីរ៉ាក់ក្នុងអំឡុងពេលសន្ទនាតាមទូរស័ព្ទ ជាមួយលោកនាយករដ្ឋមន្ត្រី ម៉ូហាម៉េដ សៀ អាល់ស៊ូដានី( Mohammed Shia Al-Sudani)។

មេដឹកនាំទាំងពីរ បាននិយាយកាលពីថ្ងៃអង្គារ ជាថ្ងៃចុងក្រោយនៃពិធីបុណ្យ Eid Al-Fitr ដែលជាថ្ងៃបញ្ចប់នៃខែតមអាហារបុណ្យរ៉ាម៉ាដាន។ ទីភ្នាក់ងារសារព័ត៌មានអារ៉ាប់ស៊ីរី រាយការណ៍ថា លោកទាំងពីរ បានពិភាក្សាអំពីការពង្រឹងទំនាក់ទំនងទ្វេភាគីរវាងស៊ីរី និងអ៊ីរ៉ាក់ ខណៈពេលដែលរក្សាទំនាក់ទំនងសេដ្ឋកិច្ច។

សារព័ត៌មាន SANA បានបន្ថែមថា លោក Al-Sharaa និង លោក អាល់ស៊ូដានី បានសង្កត់ធ្ងន់លើតម្រូវការ ដើម្បីចាប់ផ្តើមដំណាក់កាលថ្មី នៅក្នុងទំនាក់ទំនងរបស់ប្រទេសរបស់ពួកគេ ដោយផ្តោតលើកិច្ចខិតខំប្រឹងប្រែងរួមគ្នា នាពេលអនាគត ដើម្បីដោះស្រាយបញ្ហាប្រឈមក្នុងតំបន់ និងទប់ស្កាត់ភាពតានតឹង។

កិច្ចពិភាក្សាក៏បានផ្តោតទៅលើការពង្រឹងសន្តិសុខតាមព្រំដែន កិច្ចសហប្រតិបត្តិការប្រឆាំងការរត់ពន្ធគ្រឿងញៀន និងការសម្របសម្រួល ដើម្បីរក្សាស្ថិរភាព។

ប្រទេសអ៊ីរ៉ាក់ បានស្វាគមន៍ចំពោះការបង្កើតរដ្ឋាភិបាលអន្តរកាលរបស់ប្រទេសស៊ីរី ក្នុងសប្តាហ៍នេះ ដោយបានបញ្ជាក់ឡើងវិញនូវការប្តេជ្ញាចិត្តរបស់ខ្លួន ចំពោះសន្តិសុខ និងអធិបតេយ្យភាពរបស់ប្រទេសជិត    ខាង។ 

ទីភ្នាក់ងារសារព័ត៌មាន SANA បានបញ្ជាក់ថា លោក Al-Sharaa បានសង្កត់ធ្ងន់លើការគោរពរបស់ខ្លួន ចំពោះអធិបតេយ្យភាពរបស់ប្រទេសអ៊ីរ៉ាក់ ដោយសន្យាថា នឹងមិនជ្រៀតជ្រែកក្នុងកិច្ចការផ្ទៃក្នុងរបស់ទីក្រុងបាកដាដ ឡើយ។