អឺរ៉ុប៖ បណ្ដាប្រទេសនៅអឺរ៉ុបកំពុងចាប់យកវិធានការរឹតបន្តឹងកាន់តែខ្លាំងឡើង ខណៈរដ្ឋាភិបាលទូទាំងទ្វីបបានងាកទៅរកវិធីសាស្ត្រតឹងរ៉ឹង ចាប់ពីការអនុវត្តន៍វិធានការបិទខ្ទប់រហូតដល់ការផាកពិន័យ ដើម្បីបង្ខំឲ្យអ្នកដែលមិនព្រមចាក់វ៉ាក់សាំងទៅចាក់វ៉ាក់សាំងបង្ការវីរុស។ សារសំខាន់ៗសម្រាប់ពលរដ្ឋរបស់ខ្លួនគឺ៖ ចាក់វ៉ាក់សាំង ឬកុំចូលរួមក្នុងទីប្រមូលផ្ដុំដែលមានមនុស្សច្រើន។
ប្រធានគណៈកម្មាធិការអឺរ៉ុបលោកស្រី Ursula von der Leyen បាននិយាយនៅថ្ងៃនេះថា សហភាពអឺរ៉ុបគួរតែពិភាក្សាថា តើកាតព្វកិច្ចវ៉ាក់សាំងជារឿងចាំបាច់នៅទូទាំងសហភាពអឺរ៉ុបឬអត់ ដើម្បីប្រយុទ្ធប្រឆាំងនឹងការឆ្លងរាលដាលកាន់តែខ្លាំងនៃវីរុស COVID-19 និងវីរុសបម្លែងខ្លួនថ្មី Omicron ។ យ៉ាងណាការពិភាក្សាត្រូវតែធ្វើជាចាំបាច់។ ប្រទេសក្រិកកំពុងអនុវត្តន៍វិធានការប្រចាំខែដោយផាកពិន័យជាទឹកប្រាក់ចំនួន 100អឺរ៉ូស្មើ ($114) លើមនុស្សដែលមានអាយុចាប់ពី ៦០ឆ្នាំឡើងដែលមិនបានចាក់វ៉ាក់សាំង ដោយហៅការផាកពិន័យនេះថាជាថ្លៃសេវាថែទាំសុខភាព។ នៅប្រទេសអូទ្រីសបានរឹតត្បិតលើចលនាមនុស្សដែលមិនចាក់វ៉ាក់សាំង នៅក្នុងតំបន់រងគ្រោះខ្លាំងបំផុតចំនួន២ ដោយអនុញ្ញាតឲ្យអ្នកចាក់វ៉ាក់សាំងចាកចេញពីតំបន់បិទខ្ទប់ នៅពេលការរឹតត្បិតនឹងបញ្ចប់នៅពាក់កណ្ដាលខែធ្នូ ឬត្រូវផាកពិន័យជាទឹកប្រាក់ 3,600អឺរ៉ូស្មើ ($4,000)។
ប្រទេសអាល្លឺម៉ង់កំពុងប្រឈមនឹងសម្ពាធដោយដើរតាមលំនាំរបស់អូទ្រីស ខណៈកំពុងប្រឈមករណីឆ្លងរាលដាលខ្លាំង ដោយអធិការបតីអាល្លឺម៉ង់ថ្មីដែលចូលកាន់តំណែងក្នុងពេលខាងមុខលោក Olaf Scholz គាំទ្រកាតព្វកិច្ចចាក់វ៉ាក់សាំង ដែលអំពាវនាវឲ្យសភាបោះឆ្នោតគាំទ្រគម្រោងនេះ។ ប្រទេសបារាំងបានអនុវត្តន៍ផែនការកាតព្វកិច្ចវ៉ាក់សាំង លើបុគ្គលិកសុខាភិបាល និងមន្ត្រីរដ្ឋការត្រូវតែចាក់វ៉ាក់សាំងពេញលេញ និងព្យួរការងារបុគ្គលិកដែលមិនបានចាក់វ៉ាក់សាំង និងដាក់កាតវ៉ាក់សាំងតាមខ្លួនដើម្បីចូលកន្លែងសាធារណៈនានា។ នៅប្រទេសអ៊ីតាលីក៏មិនខុសពីប្រទេសបារាំងដែរ ដោយតម្រូវឲ្យបុគ្គលិកសុខាភិបាលទាំងអស់ចាក់វ៉ាក់សាំង។ ប្រទេសនេះជាប្រទេសដំបូងគេនៅអឺរ៉ុបដែលដាក់ចេញផែនការកាតព្វកិច្ចវ៉ាក់សាំង ដែលបុគ្គលិកទាំងនោះត្រូវតែបង្ហាញការចាក់វ៉ាក់សាំង ឬប័ណ្ណបញ្ជាក់សុខភាពមុនចូលកន្លែងការងារ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
