កូរ៉េខាងត្បូង កំពុងតែស្ថិតក្នុងភាពតានតឹងផ្នែកនយោបាយនៅសប្ដាហ៍នេះ ជាមួយនឹងសេចក្ដីសម្រេចលើសំណុំរឿងចោទប្រកាន់ទម្លាក់តំណែងរបស់លោកប្រធានាធិបតី Yoon Suk Yeol រំពឹងថានឹងធ្វើឡើងនៅថ្ងៃសុក្រ ០៤ មេសា ស្អែកនេះ។ ផ្លូវថ្នល់នៅខាងក្រៅតុលាការធម្មនុញ្ញក្នុងទីក្រុងសេអ៊ូល ដែលជាធម្មតាស្ងាត់ជ្រងំ ឥឡូវនេះបានក្លាយជាមូលដ្ឋាននយោបាយ និងការតវ៉ា សម្រាប់សាលក្រមដែលនឹងកំណត់អនាគតរបស់ប្រទេស។

ប៉ុន្មានខែបន្ទាប់ពីលោក Yoon បានដាក់ច្បាប់អាជ្ញាសឹក និងបង្កឱ្យមានវិបត្តិនយោបាយដ៏អាក្រក់បំផុតរបស់កូរ៉េខាងត្បូងក្នុងពេលជាច្រើនទសវត្សរ៍មក តុលាការនឹងសម្រេចនៅថ្ងៃសុក្រស្អែកនេះ ថាតើត្រូវគាំទ្រការចោទប្រកាន់ដកតំណែង ឬផ្ដល់ឱសារណកម្ម (ប្រគល់តំណែងឱ្យវិញ) ទៅដល់មេដឹកនាំដែលត្រូវបានផ្អាកពីអំណាចរូបនេះ។

សន្តិសុខត្រូវរឹតបន្តឹង មន្ត្រីនគរបាលជាង ១០.០០នាក់ ត្រូវដាក់ពង្រាយនៅក្រុងសេអ៊ូល ការហាមបង្ហោះដ្រូនត្រូវដាក់នៅលើតំបន់តុលាការ ហើយសាលារៀនជាច្រើននឹងបិទទ្វារ ខណៈអាជីវករត្រូវបានប្រាប់ឱ្យបិទហាង និងយករបស់របរផ្សេងៗ ដូចជាផើងផ្កាដែលអាចប្រើជាអាវុធបាន ចេញឱ្យអស់ពីលើផ្លូវ ដើម្បីបង្ការហិង្សាដ៏តានតឹងណាមួយ។

ប្រសិនបើលោក Yoon រួចខ្លួនពីសេចក្តីសម្រេចនោះ លោកនឹងវិលត្រលប់ទៅកាន់តំណែងប្រធានាធិបតីរបស់ខ្លួនឡើងវិញ ប៉ុន្តែប្រសិនបើតុលាការសម្រេចបណ្តេញលោកចេញពីតំណែងពិតមែន ការបោះឆ្នោតប្រធានាធិបតីថ្មីត្រូវធ្វើឡើងក្នុងពេល ៦០ថ្ងៃ៕