រដ្ឋាភិបាលកោះតៃវ៉ាន់ បាននិយាយនៅថ្ងៃព្រហស្បតិ៍ ទី ៣ ខែមេសា នេះថា ការដំឡើងពន្ធរបស់សហរដ្ឋអាមេរិក ដែលដាក់ទៅលើកោះនេះ គឺមិនសមហេតុផល ហើយកោះតៃវ៉ាន់នឹងពិភាក្សាជាមួយទីក្រុងវ៉ាស៊ីនតោន ដោយផ្នែកខ្លះមកពីការព្យាយាមទប់ស្កាត់បច្ចេកវិទ្យារបស់សហរដ្ឋអាមេរិកលើប្រទេសចិន នៅក្នុងអាណត្តិទី១របស់លោកប្រធានាធិបតី Donald Trump ដែលរុញឲ្យមានអតុល្យភាពពាណិជ្ជកម្ម។

លោក Trump កាលពីថ្ងៃពុធ បានប្រកាសការដំឡើងពន្ធនាំចូល ដោយដំឡើងពន្ធកាន់តែខ្ពស់សម្រាប់ដៃគូពាណិជ្ជកម្មរាប់សិបប្រទេស រួមទាំងកោះតៃវ៉ាន់ ដែលមានអតិរេកពាណិជ្ជកម្មដ៏ធំជាមួយសហរដ្ឋអាមេរិក ហើយមានការដាក់ពន្ធ៣២ភាគរយលើផលិតផលរបស់ខ្លួន។

ទោះជាយ៉ាងណា ការដំឡើងពន្ធរបស់សហរដ្ឋអាមេរិក មិនអនុវត្តចំពោះគ្រឿងអេឡិចត្រូនិក ជាការនាំចេញដ៏សំខាន់របស់កោះតៃវ៉ាន់នោះទេ។ គណៈរដ្ឋមន្ត្រីរបស់កោះតៃវ៉ាន់ បាននិយាយនៅក្នុងសេចក្តីថ្លែងការណ៍ថា ខ្លួនមានការសោកស្តាយចំពោះការដំឡើងពន្ធរបស់សហរដ្ឋអាមេរិក «មិនសមហេតុផល» ហើយនឹងស្វែងរកការបញ្ជាក់ច្បាស់ និងបន្តពិភាក្សាជាមួយទីក្រុងវ៉ាស៊ីនតោន ដើម្បីធានាបានថា ផលប្រយោជន៍របស់កោះតៃវ៉ាន់ ត្រូវបានការពារ។

គណៈរដ្ឋមន្ត្រី បាននិយាយបន្ថែមថា ការនាំចេញរបស់កោះតៃវ៉ាន់ និងអតិរេកពាណិជ្ជកម្មជាមួយសហរដ្ឋអាមេរិក បានកើនឡើងដោយសារតែតម្រូវការរបស់សហរដ្ឋអាមេរិកសម្រាប់គ្រឿងអេឡិចត្រូនិក និងផលិតផលទាក់ទងនឹងបញ្ញាសិប្បនិម្មិត(AI)។