ក្រុមហ៊ួទីបាននិយាយកាលពីថ្ងៃពុធថា ចំនួនអ្នកស្លាប់ពីការវាយប្រហារតាមអាកាសរបស់សហរដ្ឋអាមេរិក ទៅលើតំបន់ដែលគ្រប់គ្រងដោយក្រុមនេះ នៅភាគខាងជើងប្រទេសយេម៉ែន ចាប់តាំងពីថ្ងៃទី ១៥ ខែមីនា បានកើនឡើងដល់ ៦១នាក់ ហើយ និង ១៣៩នាក់ ផ្សេងទៀត បានរងរបួស។

នៅព្រឹកថ្ងៃដដែល ក្រុមនេះបានអះអាងថា ខ្លួនបានធ្វើការវាយប្រហារថ្មីចំនួន បីលើក ទៅលើនាវាផ្ទុកយន្តហោះ USS Harry S. Truman និងនាវាចម្បាំងដែលអមដំណើររបស់ខ្លួន នៅសមុទ្រក្រហមភាគខាងជើង ក្នុងរយៈពេល ២៤ម៉ោង កន្លងទៅ។

ក្រុមនេះ ក៏បាននិយាយផងដែរថា ចំនួនអ្នកស្លាប់ដោយសារការវាយប្រហារតាមអាកាសរបស់សហរដ្ឋអាមេរិកទៅលើខេត្ត Hodeidah ភាគខាងលិចនៃប្រទេសយេម៉ែន កាលពីយប់ថ្ងៃអង្គារ បានកើនឡើងដល់ ៤នាក់ហើយ។

ប្រព័ន្ធផ្សព្វផ្សាយរបស់ក្រុមហ៊ួទី និងអ្នកស្រុក បាននិយាយកាលពីថ្ងៃអង្គារថា ការវាយប្រហារតាមផ្លូវអាកាសថ្មីៗរបស់សហរដ្ឋអាមេរិក បានកំណត់គោលដៅលើ «គម្រោងទឹក និងអគារ នៅក្នុងស្រុក Mansouria ស្ថិតនៅកណ្តាលទីក្រុង Hodeidah ដោយបានបណ្តាលឲ្យមនុស្សយ៉ាងហោចណាស់ ៣ នាក់ ស្លាប់។

យោធាអាមេរិក បានចាប់ផ្តើមការវាយប្រហារតាមផ្លូវអាកាសឡើងវិញ នៅថ្ងៃទី ១៥ ខែមីនា បន្ទាប់ពីការគំរាមកំហែងរបស់ក្រុមហ៊ួទី ដើម្បីកំណត់គោលដៅលើនាវាដែលមានទំនាក់ទំនងមួយអ៊ីស្រាអែល រហូតដល់ជំនួយមនុស្សធម៌បន្ថែមទៀត ត្រូវបានអនុញ្ញាតឲ្យចូលទៅក្នុងតំបន់ហ្កាហ្សា។

ចាប់តាំងពីពេលនោះមក ការវាយប្រហារតាមអាកាសរបស់សហរដ្ឋអាមេរិក បានជំរុញឲ្យក្រុមហ៊ួទី កំណត់គោលដៅលើនាវាចម្បាំងអាមេរិក នៅក្នុងសមុទ្រក្រហម។

គួរបញ្ជាក់ផងដែរ កាលពីថ្ងៃចន្ទ ទី៣១ ខែមីនា ប្រធានាធិបតីអាមេរិក លោក ដូណាល់ ត្រាំ បានប្តេជ្ញាបន្តវាយប្រហារក្រុមហ៊ួទី រហូតដល់ពួកគេឈប់វាយប្រហារទៅលើនាវាចម្បាំងអាមេរិក។