ឯកអគ្គរដ្ឋទូតអង់គ្លេសប្រចាំអង្គការសហប្រជាជាតិ លោកស្រី Barbara Woodward បានអំពាវនាវឲ្យ មានវិធានការជាបន្ទាន់ ដើម្បីការពារបុគ្គលិកជំនួយ នៅក្នុងតំបន់ជម្លោះ ខណៈដែលលោកស្រី បានថ្លែងសុន្ទរកថាក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីការអនុវត្តសេចក្តីសម្រេចលេខ ២៧៣០។

ថ្លែងនៅក្នុងកិច្ចប្រជុំស្តីពីការការពារជនស៊ីវិល ក្នុងជម្លោះប្រដាប់អាវុធ លោកស្រី Woodward បានសង្កត់ធ្ងន់លើសារៈសំខាន់នៃការរក្សាសន្ទុះក្នុងការធានាសុវត្ថិភាព សន្តិសុខ និងសុខុមាលភាពរបស់បុគ្គលិក មនុស្សធម៌។

លោកស្រី បាននិយាយថា៖ «ខ្ញុំសូមសម្តែងការដឹងគុណដល់អ្នកដែលនៅជួរមុខ និងចូលរួមរំលែកទុក្ខដល់ក្រុមគ្រួសារ និងមិត្តភក្តិរបស់អ្នក ដែលបានបាត់បង់ជីវិត»។

លោក Woodward បានគូសបញ្ជាក់ពីហានិភ័យដែលកំពុងកើនឡើង ដែលបុគ្គលិកផ្តល់ជំនួយបានជួបប្រទះ ដោយលើកឡើងពីតួលេខពីមូលដ្ឋានទិន្នន័យសន្តិសុខរបស់បុគ្គលិកជំនួយ ដែលបានកត់ត្រា     អ្នកស្លាប់ចំនួន ៦៤នាក់ អ្នករងរបួស ៣៦នាក់ និង មនុស្ស ៨នាក់ ត្រូវបានចាប់ជំរិត ក្នុងរយៈពេលត្រឹមតែ ៣ ខែដំបូងនៃឆ្នាំ ២០២៥។ លោកស្រី បានកត់សម្គាល់ថា ភាគច្រើននៃអ្នកដែលរងផលប៉ះពាល់ គឺជាបុគ្គលិកជំនួយក្នុងស្រុក ឬជាតិ។