កងទ័ពលីបង់ដ៏ធំមួយ បានចូលក្នុងក្រុង Yohmor Chkeif ភាគខាងជើងទន្លេ Litani ក្នុងខេត្ត Nabatieh ភាគខាងត្បូងប្រទេសលីបង់កាលពីថ្ងៃពុធ។ គ្រាប់រ៉ូកែតជាច្រើនគ្រាប់ ត្រូវបានបាញ់ចេញពីតំបន់នេះ ឆ្ពោះទៅកាន់ប្រទេសអ៊ីស្រាអែល កាលពីសប្តាហ៍មុន។

ប្រភពសន្តិសុខ បាននិយាយថា កម្លាំងបានដើរល្បាត ក្នុងភូមិដែលហ៊ុមព័ទ្ធ នៅសងខាងមាត់ទន្លេនេះ។ វីដេអូមួយដែលត្រូវបានគេចែករំលែកនៅលើប្រព័ន្ធផ្សព្វផ្សាយសង្គម បានបង្ហាញថា ទាហានបានចូលទៅក្នុងភូមិនេះ។

អ្នកស្រុកនៃភូមិមួយផ្សេងទៀត ភាគខាងជើងនៃទន្លេ Litani បានរាយការណ៍ថា បានឃើញយានដ្រូន Cessna ជាច្រើនគ្រឿងរបស់កងទ័ពលីបង់ នៅលើអាកាសពីខាងលើខេត្ត Nabatieh កាលពីថ្ងៃពុធ។ ដោយមានការសហការជាមួយកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ អង្គភាពកងទ័ពមួយ នាពេលថ្មីៗនេះ បានចូលទៅកាន់ទីក្រុង Zawtar Al-Charqiyeh ដែលមានទីតាំងនៅក្នុងខេត្តតែមួយ។

លោក Ali Al-Amin ដែលជានិពន្ធនាយកនៃគេហទំព័រព័ត៌មាន Janoubia បានប្រាប់សារព័ត៌មាន Arab Newsថា តំបន់នេះ ត្រូវបានកំណត់លក្ខណៈដោយជ្រលងភ្នំ ភ្នំ និងភូមិសាស្ត្រពិបាកចេញចូល។ នៅក្រោមការណែនាំរបស់ក្រុមហេសបូឡា មានតែជនស៊ីវិលប៉ុណ្ណោះ ដែលត្រូវបានអនុញ្ញាតឲ្យនៅក្នុងតំបន់នោះ។ លោកបានបន្ថែមថា ប៉ុន្តែអង្គភាពកងទ័ពលីបង់មួយ បានចូលទៅក្នុងទីតាំងយោធារបស់ក្រុមហេសបូឡា នៅក្នុងទីក្រុង Wadi Zawtar Al-Charqiyeh ក្បែរទន្លេ Litani ។