សម័យប្រជុំលើកទី ៥៨ នៃក្រុមប្រឹក្សាសិទ្ធិមនុស្សអង្គការសហប្រជាជាតិ (UN) កាលពីថ្ងៃពុធ បានអនុ ម័តសេចក្តីសម្រេចមួយ ដែលទាមទារឲ្យអ៊ីស្រាអែល ទប់ស្កាត់អំពើប្រល័យពូជសាសន៍ នៅតំបន់ហ្កាហ្សាស្ទ្រីប។

អនុម័តដោយសំឡេងគាំទ្រចំនួន ២៧ សំឡេង ប្រឆាំង៤សំឡេង និងអនុប្បវាទ ១៦សំឡេង សេចក្តីសម្រេចនេះ មិនពេញចិត្តអ៊ីស្រាអែលចំពោះការរំលោភលើកិច្ចព្រមព្រៀងបទឈប់បាញ់ ហើយជំរុញឲ្យ ប្រទេសនេះ កាន់ខ្ជាប់ការទទួលខុសត្រូវរបស់ខ្លួនឲ្យបានពេញលេញ។

សេចក្តីសម្រេចនេះ ថ្កោលទោសបន្ថែមទៀតចំពោះការប្រើប្រាស់ការបង្អត់អាហាររបស់អ៊ីស្រាអែល ជាវិធីសាស្រ្តនៃសង្គ្រាម នៅតំបន់ហ្កាហ្សា ការបដិសេធដោយខុសច្បាប់នូវសិទ្ធិទទួលបានជំនួយមនុស្សធម៌ ការរារាំងដោយចេតនានៃការផ្គត់ផ្គង់ជំនួយ និងការដកហូតធនធានសំខាន់ៗដែលចាំបាច់សម្រាប់ការរស់រានមានជីវិតរបស់ជនស៊ីវិល រួមទាំងអាហារ ទឹក អគ្គិសនី ប្រេងឥន្ធនៈ និងទូរគមនាគមន៍។

សេចក្តីសម្រេចនេះ ក៏បង្ហាញពីការព្រួយបារម្ភយ៉ាងខ្លាំងចំពោះសេចក្តីថ្លែងការណ៍របស់មន្ត្រីអ៊ីស្រាអែលដែលទាក់ទងនឹងការញុះញង់ឲ្យមានអំពើប្រល័យពូជសាសន៍ និងទាមទារឲ្យអ៊ីស្រាអែលបំពេញកាតព្វកិច្ចផ្លូវច្បាប់របស់ខ្លួន ក្នុងការទប់ស្កាត់អំពើប្រល័យពូជសាសន៍។