អ៊ីស្រាអែល បានបើកការវាយប្រហារតាមអាកាសលើមូលដ្ឋានទ័ពអាកាស និងទីតាំងហេដ្ឋារចនាសម្ព័ន្ធ នៅក្នុងទីក្រុងដាម៉ាស Hama និង Homs របស់ប្រទេសស៊ីរី កាលពីថ្ងៃពុធ។

អ៊ីស្រាអែលបានចំណាយពេលជាច្រើនឆ្នាំ ដើម្បីធ្វើការវាយប្រហារតាមអាកាសលើប្រទេសស៊ីរី ក្នុងអំឡុងការគ្រប់គ្រងរបស់អតីតប្រធានាធិបតី លោក បាសា អាល់អាសាដ ( Bashar al-Assad) ដោយផ្តោតលើទីតាំងយោធាដែលមានទំនាក់ទំនងជាមួយអ៊ីរ៉ង់ និងការបញ្ជូនអាវុធពីទីក្រុងតេអេរ៉ង់ ដែលមានបំណងសម្រាប់ក្រុមប្រដាប់អាវុធលីបង់ហេសបូឡា ដែលត្រូវបានដាក់ពង្រាយ នៅក្នុងទឹកដីស៊ីរី។

ផ្លូវដឹកជញ្ជូនសព្វាវុធនោះ ត្រូវបានកាត់ផ្តាច់ នៅពេលលោក អាសាដ ត្រូវបានផ្តួលរំលំ ប៉ុន្តែអ៊ីស្រាអែលបានបន្តធ្វើការវាយប្រហារលើមូលដ្ឋានយោធាស៊ីរី។

ប្រព័ន្ធផ្សព្វផ្សាយរដ្ឋស៊ីរី និងមន្ត្រីក្នុងតំបន់ បាននិយាយថា ការវាយប្រហារ បានកំណត់គោលដៅទៅលើអាកាសយានដ្ឋានយោធា ក្នុងទីក្រុង Hama របស់ប្រទេសស៊ីរី និងតំបន់ជុំវិញមជ្ឈមណ្ឌលស្រាវជ្រាវវិទ្យាសាស្ត្រ ក្នុងសង្កាត់ Barzeh នៃទីក្រុងដាម៉ាស។

អ៊ីស្រាអែល បានទម្លាក់គ្រាប់បែកលើមូលដ្ឋាននៃមជ្ឈមណ្ឌលស្រាវជ្រាវវិទ្យាសាស្ត្រភ្លាមៗ បន្ទាប់ពីលោក អាសាដ ត្រូវបានបណ្តេញចេញពីអំណាច ដោយក្រុមឧទ្ទាមឥស្លាម កាលពីថ្ងៃទី ០៨ ខែធ្នូ ដោយអះអាងថា មជ្ឈមណ្ឌលនេះ ត្រូវបានប្រើ ដើម្បីផលិតមីស៊ីលតម្រង់គោលដៅ និងអាវុធគីមី។

អ៊ីស្រាអែលក៏បាននិយាយកាលពីថ្ងៃពុធថា ខ្លួនបានកំណត់គោលដៅលើមូលដ្ឋានទ័ពអាកាស T4 ក្នុងខេត្ត Homs ជាកន្លែងដែលត្រូវបានវាយប្រហារម្តងហើយម្តងទៀត ដោយអ៊ីស្រាអែល ក្នុងរយៈពេលមួយសប្តាហ៍កន្លងទៅនេះ។