រដ្ឋមន្ត្រីការបរទេសបារាំង បានព្រមានកាលពីថ្ងៃពុធថា ប្រសិនបើមហាអំណាចពិភពលោកមិនអាចឈានដល់កិច្ចព្រមព្រៀងថ្មីមួយជាមួយអ៊ីរ៉ង់បានភ្លាមៗទេ ជុំវិញកម្មវិធីនុយក្លេអ៊ែរដ៏ចម្រូងចម្រាសនោះ ការប្រឈមមុខដាក់គ្នាផ្នែកយោធា ទំនងជា «ចៀសមិនផុត» ឡើយ។

ដោយនិយាយបន្ទាប់ពីប្រធានាធិបតីបារាំង លោក Emmanuel Macron បានកោះប្រជុំបិទទ្វារដ៏កម្រមួយ រវាងរដ្ឋមន្ត្រី និងអ្នកជំនាញសំខាន់ៗ កាលពីថ្ងៃពុធ (ទី២ ខែមេសា) ដើម្បីពិភាក្សាអំពីបញ្ហាអ៊ីរ៉ង់ លោក Jean-Noel Barrot ហាក់ដូចជាបង្កើនសម្ពាធលើទីក្រុងតេអេរ៉រង់។

មហាអំណាចអ៊ឺរ៉ុប កំពុងស្វែងរកការបង្កើតផ្លូវការទូត ក្នុងគោលបំណងឲ្យបានឈានដល់កិច្ចព្រមព្រៀងមួយ ដើម្បីទប់ស្កាត់សកម្មភាពចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់ នៅរដូវក្តៅ និងមុនកាលកំណត់ នៅខែតុលា ឆ្នាំ២០២៥ នៅពេលដែលទណ្ឌកម្មរបស់អង្គការសហប្រជាជាតិ (UN) ទាក់ទងនឹងកិច្ចព្រមព្រៀងឆ្នាំ២០១៥ ស្តីពីកម្មវិធីនុយក្លេអ៊ែរអ៊ីរ៉ង់ជាមួយមហាអំណាចពិភពលោក ត្រូវផុតកំណត់។

មហាអំណាចលោកខាងលិច លើកឡើងថា កម្មវិធីនុយក្លេអ៊ែរ ស្មើនឹងកិច្ចប្រឹងប្រែងក្លែងបន្លំ ដើម្បីអភិវឌ្ឍគ្រាប់បែកបរមាណូ។ អ៊ីរ៉ង់បានបដិសេធជាយូរមកហើយថា ខ្លួនមិនបានប្រឹងប្រែងផលិតអាវុធនុយក្លេអ៊ែរនោះទេ។

លោក Barrot បានប្រាប់សវនាការសភាថា៖ «ឱកាស គឺកាន់តែអស់ទៅៗហើយ។ យើងមានពេលតែ ២-៣ខែប៉ុណ្ណោះ ពោលគឺរហូតដល់ការផុតកំណត់នៃកិច្ចព្រមព្រៀងនេះ (ឆ្នាំ២០១៥) ។ ក្នុងករណីមានការបរាជ័យ ការប្រឈមមុខដាក់គ្នាខាងយោធា ទំនងជាស្ទើរតែចៀសមិនផុតឡើយ»។

ប្រធានាធិបតីអាមេរិក លោក Donald Trump ដែលបានជំរុញឲ្យមេដឹកនាំកំពូលអ៊ីរ៉ង់ លោក Ayatollah Ali Khamenei ចូលរួមក្នុងការចរចាភ្លាមៗនោះ បានគំរាមកំហែងអ៊ីរ៉ង់ កាលពីថ្ងៃអាទិត្យចុងប្ដាហ៍កន្លងមក ដោយការទម្លាក់គ្រាប់បែក និងដំឡើងពន្ធបន្ថែម ប្រសិនបើប្រទេសនេះមិនឈានដល់កិច្ចព្រមព្រៀងលើកម្មវិធីនុយក្លេអ៊ែររបស់ខ្លួនទេនោះ៕