តុលាការធម្មនុញ្ញរបស់កូរ៉េខាងត្បូង គ្រោងនឹងកាត់សេចក្តីនៅថ្ងៃទី៤ ខែមេសា ថា តើត្រូវដកតំណែងប្រធានាធិបតី លោក Yoon Suk Yeol ឬយ៉ាណា ជុំវិញការលុបចោលច្បាប់អាជ្ញាសឹករបស់លោក ដែលបានធ្វើឲ្យប្រទេសនេះធ្លាក់ចូលក្នុងភាពវឹកវរផ្នែកនយោបាយ។

លោក Yoon ដែលបាននិយាយការពារការប៉ុនប៉ងរបស់លោក កាលពីថ្ងៃទី៣ ខែធ្នូ ក្នុងការបង្វែរការគ្រប់គ្រងស៊ីវិលថា ជាការចាំបាច់ ដើម្បីលុបបំបាត់ «កម្លាំងប្រឆាំងរដ្ឋ» នៅតែមានអ្នកគាំទ្រមិនងាករេ ដោយពួកគេបានធ្វើបាតុកម្មជាច្រើនសប្តាហ៍ ក្នុងអំឡុងពេលមុនទៅដល់ការប្រកាសសាលក្រមនោះ។

ប៉ុន្តែបាតុកររាប់ម៉ឺននាក់ ក៏បានសម្រុកចេញមកតាមដងផ្លូវជារៀងរាល់ចុងសប្តាហ៍ ដើម្បីទាមទារឲ្យតុលាការដកតំណែងរបស់លោក។ ពួកគេនិយាយថា ការបរាជ័យ ក្នុងការចាត់វិធានការ អាចបង្កគ្រោះថ្នាក់ដល់លទ្ធិប្រជាធិបតេយ្យដែលប្រទេសរបស់ពួកគេ បានទទួលតាំងពីឆ្នាំ១៩៨៧ មក ក្រោយបញ្ចប់របបផ្តាច់ការជាច្រើនឆ្នាំ។

សារព័ត៌មាន AFP បានសួរទៅកាន់ប្រជាជននៅទីក្រុងសេអ៊ូល អំពីអារម្មណ៍របស់ពួកគេ។ លោក Lee Jae-hee វ័យ ៤៧ឆ្នាំ បាននិយាយថា លោកសង្ឃឹមថា តុលាការនឹងតម្កល់ការចោទប្រកាន់ទម្លាក់តំណែងរបស់លោក Yoon។ ចំណែកបុគ្គលិកសុខុមាលភាពម្នាក់ បានប្រាប់សារព័ត៌មាន AFP ថា៖ «ខ្ញុំបានដឹងថាមូលដ្ឋានគ្រឹះនៃនីតិរដ្ឋ គឺជាសុជីវធម៌។ ខ្ញុំមិនគិតថា លោកប្រធានាធិបតី Yoon ធ្លាប់ប្រព្រឹត្តក្នុងស្មារតីបែបនេះទេ។ នោះហើយជាមូលហេតុដែលខ្ញុំជឿថា រូបលោកត្រូវទទួលការចោទប្រកាន់ទម្លាក់តំណែងទាំងស្រុង»។

គួររំលឹកថា នៅយប់ថ្ងៃប្រកាសច្បាប់អាជ្ញាសឹករបស់លោក Yoon លោកបានបញ្ជូនទាហានប្រដាប់អាវុធទៅកាន់សភា និងគណៈកម្មាធិការរៀបចំការបោះឆ្នោតរបស់ប្រទេស ដើម្បីស្វែងរកភស្តុតាងដែលបង្ហាញថា មានការក្លែងបន្លំអ្នកបោះឆ្នោត។ អ្នកជំនាញបានរិះគន់យ៉ាងទូលំទូលាយ ចំពោះការកំណត់គោលដៅលើការិយាធិបតេយ្យនៃប្រព័ន្ធបោះឆ្នោតរបស់ប្រទេស ដោយនិយាយថា មិនមានភស្តុតាងនៃការក្លែងបន្លំលើសពីការឃុបឃិតដែលរីករាលដាលតាមអ៊ីនធឺណិតនោះទេ។

យ៉ាងណាក្ដី សម្រាប់ពេលនេះ ប្រជាជនកូរ៉េខាងត្បូង ទាំងអ្នកគាំទ្រ និងអ្នកប្រឆាំងលោកប្រធានាធិបតី កំពុងរង់ចាំការប្រកាសសាលក្រមរបស់តុលាការយ៉ាងអន្ទះសា៕