ឆ្មាំល្បាតឆ្នេរក្រិក និយាយថា ជនអន្តោប្រវេសន៍យ៉ាងហោច ៧នាក់ បានស្លាប់ រួមទាំងទារកម្នាក់ ក្មេងស្រីម្នាក់ និងស្រ្តី ២នាក់ ពេលដែលទូករបស់ពួកគេលិចនៅជិតកោះ Lesbos នាព្រឹកទាបភ្លឺថ្ងៃព្រហស្បតិ៍នេះ ។

ទូកលិចមួយគ្រឿងនេះ ត្រូវបានប្រទះឃើញដោយនាវាល្បាតរបស់ឆ្មាំល្បាតឆ្នេរ កាលពីវេលាម៉ោង ២យប់រំលងអាធ្រាត្រ ម៉ោងក្នុងស្រុក នៅភាគខាងជើងកោះ Lesbos ។

មន្រ្តីឆ្មាំល្បាតឆ្នេរមួយរូបនិយាយថា មកទល់នឹងពេលនេះ ជនអន្តោប្រវេសន៍ ២៣នាក់ ត្រូវបានសង្រ្គោះ ហើយប្រតិបត្តិការរុករកនៅតែបន្ត ។ គេនៅមិនទាន់ដឹងច្បាស់នោះទេថាតើមានមនុស្សប៉ុន្មាននាក់នៅលើទូកលិចមួយគ្រឿងនេះ ។

ក្រិកដែលស្ថិតនៅជ្រោយភាគអាគ្នេយ៍សហភាពអឺរ៉ុប បានក្លាយជាច្រកចូលដ៏ពេញនិយមួយទៅកាន់អឺរ៉ុបសម្រាប់ក្រុមជនអន្តោប្រវេសន៍ និងជនភៀសខ្លួនមកពីតំបន់មជ្ឈិមបូព៌ា អាហ្វ្រិក និងអាស៊ី ។

កាលពីឆ្នាំ ២០១៥ មនុស្សជិត ១លាននាក់ បានធ្វើដំណើរទៅដល់បណ្តាកោះរបស់ពួកគេ ។

កាលពីឆ្នាំមុន ជនអន្តោប្រវេសន៍ប្រហែល ៥៤.០០០នាក់ បានធ្វើដំណើរទៅដល់ប្រទេសក្រិក ដែលជាចំនួនច្រើនបំផុតជាប់ចំណាត់ថ្នាក់លេខ ២នៅភាគខាងត្បូងអឺរ៉ុប ពីក្រោយប្រទេសអ៊ីតាលី ៕