កងទ័ពឥណ្ឌា បានដំឡើងមន្ទីរពេទ្យបណ្តោះអាសន្នមាន ៦០គ្រែ នៅទីក្រុងម៉ាន់ដាឡេ ដែលជាទីក្រុងធំបំផុតទី ២របស់មីយ៉ាន់ម៉ា ជាទីដែលការរញ្ជួយដីកម្រិត ៧,៧រ៉ិចទ័រ បានសម្លាប់មនុស្សរាប់ពាន់នាក់ និងបណ្តាលឲ្យមានការខូចខាតទ្រង់ទ្រាយធំ ។

កងទ័ពឥណ្ឌា បានព្យាបាលជនរងគ្រោះជាង ១៥០នាក់ នៅមន្ទីរពេទ្យបណ្តោះអាសន្នមួយនេះ ដែលត្រូវបានបង្កើតឡើងកាលពីថ្ងៃអង្គារ ។

មន្ទីរពេទ្យមួយនេះ នឹងជួយដោះស្រាយករណីអ្នករងរបួសធ្ងន់ធ្ងរ ការវះកាត់បន្ទាន់ ហើយនិងផ្តល់សេវាកម្មវេជ្ជសាស្រ្តចាំបាច់ ដើម្បីគាំទ្រដល់ការថែទាំងសុខភាពក្នុងស្រុក ដែលរងផលប៉ះពាល់យ៉ាងធ្ងន់ធ្ងរដោយសារគ្រោះមហន្តរាយមួយនេះ ។

ចំនួនមនុស្សស្លាប់ដោយសារការរញ្ជួយដីកាលពីថ្ងៃសុក្រ បានកើនឡើងដល់ជាង ៣ពាន់នាក់ ក្នុងនោះមនុស្សរាប់រយនាក់ផ្សេងទៀត កំពុងបាត់ខ្លួន ស្របពេលដែលការព្យាករណ៍ពីមេឃភ្លៀងកក់ខែ នឹងក្លាយជាការលំបាកថ្មីសម្រាប់ក្រុមជួយសង្រ្គោះ និងក្រុមផ្តល់ជំនួយ ដែលព្យាយាមទៅដល់មនុស្សនៅក្នុងប្រទេសដែលបានញាំញីរួចទៅហើយដោយសារសង្រ្គាមស៊ីវិល ៕