រុស្ស៊ី នៅថ្ងៃព្រហស្បតិ៍ (ទី៣ ខែមេសា) នេះ បានលើកឡើងថា ការគំរាមវាយប្រហារផ្នែកយោធាលើអ៊ីរ៉ង់ ដែលជាសម្ព័ន្ធមិត្តរបស់ខ្លួន គឺមិនអាចទទួលយកបានឡើយ ហើយបានព្រមានថា ការធ្វើបែបនោះលើសាធារណរដ្ឋឥស្លាមមួយនេះ អាចនាំឲ្យមានលទ្ធផលដ៏មហន្តរាយ ប្រសិនបើទីតាំងដំឡើងនុយក្លេអ៊ែរ ត្រូវបានទម្លាក់គ្រាប់បែក។

គួរបញ្ជាក់ថា កាលពីថ្ងៃអាទិត្យចុងសប្ដាហ៍កន្លងមក ប្រធានាធិបតីអាមេរិក លោក Donald Trump បានគំរាមអ៊ីរ៉ង់ ជាមួយនឹងវិធានការទម្លាក់គ្រាប់បែក និងយកពន្ធបន្ថែម ប្រសិនបើទីក្រុងតេអេរ៉ង់មិនឈានដល់កិច្ចព្រមព្រៀងជាមួយទីក្រុងវ៉ាស៊ីនតោន ជុំវិញកម្មវិធីនុយក្លេអ៊ែររបស់ខ្លួនទេនោះ ហើយសហរដ្ឋអាមេរិកបានចល័តយន្តហោះចម្បាំងបន្ថែមចូលទៅក្នុងតំបន់នេះ។

នៅពេលត្រូវបានសួរអំពីកម្មវិធីនុយក្លេអ៊ែររបស់អ៊ីរ៉ង់ និងគ្រោះថ្នាក់នានា ក្នុងស្ថានភាពបច្ចុប្បន្ន ក្រសួងការបរទេសរុស្ស៊ី បានឆ្លើយតបថា ទីក្រុងមូស្គូបានប្តេជ្ញាចិត្តក្នុងការស្វែងរកដំណោះស្រាយ ចំពោះកម្មវិធីនុយក្លេអ៊ែររបស់អ៊ីរ៉ង់ ដែលគោរពសិទ្ធិរបស់ទីក្រុងតេអេរ៉ង់ ក្នុងការផលិតថាមពលនុយក្លេអ៊ែរដោយសន្តិវិធី។

អ្នកនាំពាក្យរបស់ក្រសួង លោកស្រី Maria Zakharova បានប្រាប់អ្នកសារព័ត៌មានថា៖ «ការប្រើប្រាស់កម្លាំងយោធាដោយគូប្រជែងរបស់អ៊ីរ៉ង់ ក្នុងបរិបទស្វែងរកដំណោះស្រាយនោះ គឺខុសច្បាប់ និងមិនអាចទទួលយកបានឡើយ»។

ទីក្រុងតេអេរ៉ង់បញ្ជាក់ថា កម្មវិធីនុយក្លេអ៊ែររបស់ខ្លួន គឺសម្រាប់គោលបំណងថាមពលស៊ីវិលទាំងស្រុង។ រុស្ស៊ី និងអ៊ីរ៉ង់បានចុះហត្ថលេខាលើ «កិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយ» កាលពីខែមករា តែមិនមានលក្ខន្តិកការពារគ្នាទៅវិញទៅមកឡើយ។ នៅក្រោមកិច្ចព្រមព្រៀងនោះ ប្រសិនបើភាគីណាមួយ ត្រូវបានវាយប្រហារ នោះភាគីម្ខាងទៀត នឹងមិនជួយគាំទ្រដល់អ្នកលុកលុយឡើយ៕