ជនប៉ាឡេស្ទីនគ្រោះថ្នាក់ដោយសារការវាយប្រហាររបស់អ៊ីស្រាអែល ត្រូវបានប្រញាប់ប្រញាល់រួសរាន់បញ្ជូនទៅកាន់មន្ទីរពេទ្យនៅតំបន់ហ្កាហ្សាស្រ្ទីប ។ 

ក្រុមមន្រ្តីសុខភាពហ្កាហ្សា និយាយថា ការវាយប្រហាររបស់អ៊ីស្រាអែលកាលពីយប់កន្លងទៅ បានសម្លាប់មនុសសយ៉ាងហោច ៥៥នាក់ នៅទូទាំងតំបន់ហ្កាហ្សាស្រ្ទីប ពោលគឺរយៈពេល ១ថ្ងៃប៉ុណ្ណោះ ក្រោយក្រុមមន្រ្តីជាន់ខ្ពស់អ៊ីស្រាអែលនិយាយថា អ៊ីស្រាអែល នឹងរឹបអូសតំបន់ជាច្រើននៅទូទាំងដែនដីមួយនេះ និងបង្កើតច្រករបៀងសន្តិសុខថ្មី ។ 

អ៊ីស្រាអែល សន្យាថានឹងបង្កើនការធ្វើសង្រ្គាមរយៈពេលជិត ១៨ខែជាមួយក្រុមហាម៉ាស រហូតដល់ក្រុមជីវពលមួយនេះ ប្រគល់ចំណាប់ថ្នូររាប់សិបនាក់នៅសេសសល់ត្រឡប់មកវិញ ក៏ដូចជាដាក់អាវុធចុះ និងចាកចេញពីដែនដីមួយនេះ ។

អ៊ីស្រាអែល បានបញ្ឈប់ការនាំចូលស្បៀងអាហារ ប្រេងឥន្ធនៈ និងជំនួយមនុស្សធម៌អស់រយៈពេល ១ខែមកហើយ ដែលធ្វើឲ្យជនស៊ីវិលប្រឈមនឹងកង្វះខាតធ្ងន់ធ្ងរ ស្របពេលដែលការផ្គត់ផ្គង់លែងមាននោះ ៕