​បាល់ទាត់៖ ​ក្រុម​ខ្លាំង​កំពូល​តារាង​ទាំង​ ៣ នៅតែ​បន្ត​ប្រដេញ​ពិន្ទុ​គ្នា​ប្រកៀក​ប្រកិត​ដដែល ក្រោយ​រក​បាន​ជ័យជំនះ​ដូចគ្នា​ក្នុង​សប្តាហ៍​ទី១៤ នៃ​ក្រប​ខណ្ឌ English Premier League​។ ​​ក្រុម​កំពូល​តារាង​តោ​ខៀវ Chelsea ធ្វើដំណើរ​ទៅ​យក ៣​ពិន្ទុ​ពី​ទឹកដី Watford ២-១ តាមរយៈ​គ្រាប់​បាល់​នាំមុខ​របស់ Mason Mount មុន​ពេល​ដែល Watford តាម​ស្មើដោយ Emmanuel Dennis​។

​​យ៉ាង​ណាក្តី​ក្រុម​ជើងឯក UCL រដូវ​កាល​មុន​មួយ​នេះ​ក៏​រកបាន​គ្រាប់​ជ័យជំនះ​ដោយ Hakim Ziyech នៅ​នាទី​ទី៧២​។​ ​​ងាក​មក​ក្រុម​លេខ២ Manchester City ក៏​រក​បាន​ជ័យជំនះ​ប្រផិតប្រផើយ ២-១ ដែរ​នៅ​ទឹកដី Aston Villa ដែល​ធ្វើ​ឱ្យ Steven Gerrard ស្គាល់​បរាជ័យ​ដំបូងក្រោយ​ផ្លាស់​មក​ដឹកនាំ​ពី Rangers​។​ ​​Ruben Diaz និង Bernardo Silva រក​បាន​ម្នាក់​មួយ​គ្រាប់​ក្នុង​វគ្គ​ទី១ មុន​ពេល​ដែល​ម្ចាស់ផ្ទះ​តប​បាន​មួយ​គ្រាប់​វិញ​នៅ​វគ្គ​ទី២ ដោយ Ollie Watkins​។ ​​ចំណែកឯ​ជំនួប Merseyside Derby, Everton ទទួល Liverpool នៅ Goodison Park ក្រុម​របស់លោក Rafael Benitez បាន​រង​បរាជ័យ​ធ្ងន់​នៅពេល​ជួប​អតីត​ក្រុម​ដែល​លោក​ដឹកនាំ​ហង្ស​ក្រហម Liverpool​។​

​​ក្រុម​របស់លោក Jurgen Klopp បាន​នាំ​មុខមុន ២គ្រាប់​ដោយ Jordan Henderson និង Mohamed Salah មុន​ពេលដែល​ម្ចាស់ផ្ទះ​តប​បាន​មួយ​គ្រាប់​វិញ​ដោយ Demarai Gray​។ វគ្គ​ទី២ Salah ក៏​រកបាន​គ្រាប់​ទី២ របស់ខ្លួន​ ខណៈ​ខ្សែប្រយុទ្ធ​ព័រទុយហ្កាល់ Diogo Jota បន្ថែម​មួយគ្រា​ប់​ចុងក្រោយ​ឱ្យ Liverpool យកឈ្នះ ៤-១ លើ Everton​។​ ​​ក្រោយ​ជ័យជំនះ​រៀងខ្លួន​នេះ Chelsea បន្ត​នាំមុខគេ​មាន ៣៣ពិន្ទុ​តាម​ពីក្រោយ​ដោយ Manchester City ៣២ពិន្ទុ​ និង Liverpool ៣១​ពិន្ទុ​។ ​​រីឯ West Ham បន្ត​ឈរ​លេខ៤ ទោះ​ស្មើ Brighton ១-១ យប់មិញ​តែ​ត្រូវ​ដេញ​ពីក្រោយ Liverpool ដល់​ទៅ ៧ពិន្ទុ​៕

​អត្ថបទ​៖​នាង សុភា​វុ​ធ