ភ្នំពេញ ៖ បន្ទាប់ពីបើកដំណើរវិញនូវអាជីកម្ម KTV និងក្លឹបឌីស្កូតែក បណ្តាអ្នកគ្រប់គ្រងអាជីវកម្មទាំងនោះ បានថ្លែងអំណរគុណប្រមុខថ្នាក់ដឹកនាំរាជរដ្ឋាភិបាល ដែលអនុញ្ញាតបើក និងបានជម្រុញបុគ្គលិកកម្មករនិយោជិកដែលបានផ្អាក គឺមានការងារធ្វើឡើងវិញ ខណៈនៅយប់ថ្ងៃដំបូងមានទីតាំងKTV និងក្លឹបឌីស្កូតែកប្រមាណជិត ៨០កន្លែងបានបើកដំណើរវិញ។

បើតាមលោក អ្នកគ្រប់គ្រង ACE Launce បានថ្លែងថា អស់រយៈពេលជាង២០ខែមកហើយ ដែល​បណ្តា​អាជីកវម្ម​ខារា​អូខេ KTV ក្លឹបរង្គសាល ឌីស្កូតែក ​បានបិទទា្វរផ្អាកការធ្វើអាជីកម្មទាំងអស់គ្នា ដោយ​សារវិបត្តិការរីករាល​ដាល​មេរោគ​កូវីដ១៩ ​ហើយទើបតែមកដល់ពេលនេះទេ ដែល​សម្តេចតេជោ ហ៊ុន សែន​ ប្រកាសបើកដំណើរការវិញ ​ហើយ​ការ​បើក​អាជីវ​កម្ម​នោះ គឺយើងបើក​ដោយមានប្រុងប្រយ័ត្នជាទីបំផុត ​ខណៈអាជីវកម្មទេសចរណ៍ប្រភេទ ​ជាអាជីវកម្មដែល​មាន​ហានិភ័យ​ខ្ពស់ចំពោះការរាតត្បាតឆ្លងនៃមេរោគកូវីដ១៩។

តែទោះយ៉ាងណាក៏ដោយ ​បណ្តាអ្នកគ្រប់គ្រង និងបុគ្គលិកក្លឹបACE សូមថ្លែងអំណរគុណ​សម្តេច​តេជោ​ជាខ្លាំង​ដែល​អនុញ្ញាត​បើក​អាជីវកម្មទេសចរណ៍ទាំងនោះ និងបានផ្តល់ឱកាស​អោយ​បុគ្គលិក​ទាំងអស់​មានការងារធ្វើ និង​មាន​ចំណូល​ផ្គត់ផ្គង់​ជីវភាព​គ្រួសារឡើងវិញ។

ទោះយ៉ាងណាក៏ដោយ សម្តេចតេជោ ហ៊ុន សែន ក្នុង​ឱកាសសម្ពោធដាក់ឱ្យប្រើប្រាស់ជាផ្លូវការនូវ​ហេដ្ឋា​រចនា​សម្ព័ន្ធផ្លូវ៣៧ខ្សែនិងស្ថានីយប្រព្រឹត្តិកម្មទឹកកខ្វក់ទី១និងទី២ក្នុងខេត្តព្រះសីហនុ បាន​ក្រើនរំលឹកអោយ​បណ្តាអាជីវកម្ម​ខារ៉ាអូខេ KTV ក្លឹបរង្គសាល ឌីស្កូតែកដែលបើកដំណើរ​ការត្រូវ​បង្កើន​ការប្រុងប្រយ័ត្ន​អោយបានជាប់ជាប្រចំា ​ចៀសវាង​ការ​ចម្លងមេរោគ ​ចូលក្នុងក្រុមគ្រួសារ។

បើតាមលោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ ​បានថ្លែងថា នៅក្នុងរាជធានី​ភ្នំពេញ កន្លងមក​មាន​អាជីវកម្មខារ៉ាអូខេ KTV ក្លឹបរង្គសាល ឌីស្កូតែក ចំនួនជិត ២០០ទីតាំង​បានបិទទា្វរ ​បានបង្កការបាត់បង់ការងារដោយ​ផ្ទាល់​ប្រមាណជាង ៥ម៉ឺននាក់ បាត់បង់ការងារ​និង​ចំណូល​ដោយ​ទៅលើមនុស្សជាង ១៥ម៉ឺននាក់​ ហើយបន្ទាប់ពីសម្តេច​តេជោ ប្រកាសអនុញ្ញាត​អោយ​បើកទា្វរវិញ គឺមានបុគ្គលិកកម្មករនិយោជិកចាប់ផ្តើមចូលធ្វើការងារឡើងវិញជាបណ្តើរ៕

អត្ថបទ ៖ ស៊ុម សុខជា