រដ្ឋាភិបាលស៊ីរី និងកងកម្លាំងប្រជាធិបតេយ្យស៊ីរីគាំទ្រដោយសហរដ្ឋអាមេរិក (SDF) និងដឹកនាំដោយក្រុមឃឺដ បានអនុវត្តកិច្ចព្រមព្រៀងដោះដូរអ្នកទោសនៅទីក្រុងអាឡិបប៉ូភាគខាងជើង កាលពីថ្ងៃព្រហស្បតិ៍។ ទីភ្នាក់ងារសារព័ត៌មានរដ្ឋរបស់ប្រទេសស៊ីរី SANA បានរាយការណ៍ថា អ្នកទោសចំនួន២៥០ នាក់ត្រូវបានដោះដូរ រវាងកងកម្លាំងប្រជាធិបតេយ្យស៊ីរី និងរដ្ឋាភិបាលស៊ីរី។

សាច់ញាតិ និងក្រុមគ្រួសារក្នុងភាពក្តុកក្តួល បានរង់ចាំដោយក្តីអន្ទះសារដើម្បីជួបជុំជាមួយមនុស្សជាទីស្រលាញ់របស់ពួកគេ ដែលបានវិលត្រឡប់មកវិញ មានទាំងទឹកភ្នែក និងភាពរីករាយ។ អ្នកទោស រួមមានអ្នកប្រយុទ្ធដែលត្រូវបានឃុំខ្លួនក្នុងរយៈពេលប៉ុន្មានខែថ្មីៗនេះ ដោយភាគីទាំងសងខាង។

មន្ត្រីម្នាក់និយាយថា ការដោះដូរនេះគឺជាផ្នែកមួយនៃកិច្ចព្រមព្រៀងដ៏ទូលំទូលាយរវាងកងកម្លាំងប្រជាធិបតេយ្យស៊ីរី(SDF) និងរដ្ឋាភិបាលស៊ីរី ដើម្បីធ្វើសមាហរណកម្មកងកម្លាំងប្រជាធិបតេយ្យស៊ីរី ទៅក្នុងស្ថាប័នរដ្ឋថ្មីរបស់ប្រទេសស៊ីរី។

កិច្ចព្រមព្រៀងដែលបានចុះហត្ថលេខាកាលពីខែមុន រួមមានការបញ្ចប់អរិភាពទាំងស្រុង និងសម្រាប់ស្ថាប័នស៊ីវិល និងយោធា គ្រប់គ្រងដោយកងកម្លាំងប្រជាធិបតេយ្យស៊ីរី រួមទាំងអាកាសយានដ្ឋាន វាលអណ្តូងប្រេងនិងឧស្ម័ន ដើម្បីក្លាយជាផ្នែកមួយនៃរដ្ឋបាលទីក្រុងដាម៉ាស។