មន្ត្រីតំបន់ម្នាក់ បាននិយាយកាលពីថ្ងៃព្រហស្បតិ៍ថា យ៉ាងហោចណាស់មនុស្ស ៣០នាក់ ត្រូវបានសម្លាប់នៅពេលដែលទីក្រុងភាគខាងជើងប្រទេសស៊ូដង់ខាងត្បូងមួយ ត្រូវបានវាយលុកមួយប្រាវ ដោយក្រុម   យុវជនប្រដាប់អាវុធ បន្ទាប់ពីមានការវាយឆ្មក់លើគោក្របី។

ការប៉ះទង្គិចគ្នាដែលពាក់ព័ន្ធនឹងក្រុមកសិករ និងសហគមន៍តាំងទីលំនៅ គឺជារឿងធម្មតា នៅក្នុងប្រទេសដែលក្មេងខ្ចីជាងគេបំផុតរបស់ពិភពលោក ប៉ុន្តែឧប្បត្តិហេតុនេះ បានកើតឡើង នៅពេលដែលភាពតានតឹងកើនឡើងជុំវិញស្ថានភាពនយោបាយដ៏ផុយស្រួយរបស់ស៊ូដង់ខាងត្បូង។

លោក Simon Chol Mialith រដ្ឋមន្ត្រីក្រសួងព័ត៌មានក្នុងតំបន់ បាននិយាយថា ការវាយប្រហារនៅតំបន់រដ្ឋបាល Ruweng ភាគខាងជើង បានចាប់ផ្តើម នៅដើមសប្តាហ៍នេះ នៅពេលដែលក្រុមយុវជនប្រដាប់អាវុធមួយក្រុម បានលួចចៀមជាច្រើនក្បាល មុនពេលពួកគេ ត្រូវបានដេញតាមចាប់ ដោយកងកម្លាំងសន្តិ     សុខ។

លោកបានប្រាប់សារព័ត៌មាន AFPថា  នៅថ្ងៃបន្ទាប់ ក្រុមនេះ បានត្រឡប់មកវិញ ក្នុងចំនួនកាន់តែច្រើន ហើយបានវាយប្រហារលើតំបន់ Abiemnom ហើយទោះបីជា «ក្រុមយុវជន និងកងកម្លាំងសន្តិសុខ បានព្យាយាមការពារតំបន់នេះក៏ដោយ ក៏ពួកគេត្រូវបានវាយប្រហារដោយក្រុមយុវជនប្រដាប់អាវុធ Mayom  ដែរ។

លោក Mialith បាននិយាយថា កាលពីថ្ងៃពុធ កងកម្លាំងការពារប្រជាជនស៊ូដង់ខាងត្បូង (SSPDF) បានបណ្តេញក្រុមនេះ ចេញពីកន្លែងតាំងទីលំនៅ ហើយនៅពេលនេះ ភាពស្ងប់ស្ងាត់ ត្រូវបានស្តារឡើងវិញ។