រដ្ឋមន្ត្រីការបរទេសអាមេរិក លោក Marco Rubio និងបេសកជនថ្មីរបស់រដ្ឋបាលលោក ដូណាល់ ត្រាំ ប្រចាំអង្គការណាតូ ( NATO) កំពុងស្វែងរកការធានាដល់សមាជិកដែលមានការមិនទុកចិត្ត នូវការប្តេជ្ញាចិត្តរបស់សហរដ្ឋអាមេរិកចំពោះសម្ព័ន្ធភាពយោធានេះ។

លោក Rubio កាលពីថ្ងៃព្រហស្បតិ៍ បានរិះគន់ «ភាពជ្រួលច្របល់ និងការនិយាយបំផ្លើស» នៅក្នុងប្រព័ន្ធផ្សព្វផ្សាយអំពីចេតនារបស់ប្រធានាធិបតីអាមេរិក លោក ដូណាល់ ត្រាំ ទោះបីជាមានសញ្ញាជាបន្តបន្ទាប់ពីទីក្រុងវ៉ាស៊ីនតោនដែលថា អង្គការណាតូ ដែលអង្គការនេះ កើតមានរយៈពេល ៧៥ឆ្នាំហើយ ប្រហែលជាលែងពាក់ព័ន្ធតទៀតហើយ។

លោក Rubio និងឯកអគ្គរដ្ឋទូតអាមេរិកថ្មីប្រចាំអង្គការណាតូ លោក Matt Whitaker កំពុងស្ថិតនៅក្នុងទីក្រុងប្រ៊ុចសែលសម្រាប់កិច្ចប្រជុំរដ្ឋមន្ត្រីការបរទេសនៃសម្ព័ន្ធភាពយោធានេះ ដែលមនុស្សជាច្រើនសង្ឃឹមថា លោក Rubio នឹងបង្ហាញអំពីផែនការសន្តិសុខរបស់សហរដ្ឋអាមេរិក នៅអឺរ៉ុប។

លោក Rubio បានប្រាប់អ្នកសារព័ត៌មាន នៅពេលលោកបានស្វាគមន៍អគ្គលេខាធិការណាតូ លោក Mark Rutte មុនពេលកិច្ចប្រជុំចាប់ផ្តើមថា៖«សហរដ្ឋអាមេរិក នៅតែមានសកម្មភាព នៅក្នុងអង្គការណាតូ ដូចដែលខ្លួន ធ្លាប់មានពីមុនមកដដែល។ «ចំណែកភាពជ្រួលច្របល់ និងនិយាយបំផ្លើសមួយចំនួន ដែលខ្ញុំបានឃើញ នៅក្នុងប្រព័ន្ធផ្សព្វផ្សាយពិភពលោក និងប្រព័ន្ធផ្សព្វផ្សាយក្នុងស្រុកខ្លះ នៅសហរដ្ឋអាមេរិកអំពីអង្គការណាតូ គឺពុំមានភាពត្រឹមត្រូវទេ។

លោក Rubio បាននិយាយថា៖«លោកប្រធានាធិបតី ត្រាំ បានបញ្ជាក់យ៉ាងច្បាស់ថា លោកគាំទ្រអង្គការណាតូ»។ «យើងនឹងបន្តនៅក្នុងអង្គការណាតូ»។