ឧត្តមស្នងការអង្គការសហប្រជាជាតិ (UN) ទទួលបន្ទុកសិទ្ធិមនុស្ស កាលពីថ្ងៃព្រហ្បសតិ៍ (ទី៣ ខែមេសា) បាននិយាយថា ការស្លាប់របស់បុគ្គលិកពេទ្យ និងមនុស្សធម៌ចំនួន ១៥នាក់ នៅតំបន់ហ្កាហ្សា បន្ទាប់ពីការបាញ់ប្រហារត្រូវចំរថយន្តសង្គ្រោះបន្ទាន់របស់ពួកគេ ធ្វើឲ្យមានការព្រួយបារម្ភបន្ថែមទៀតពីការប្រព្រឹត្តិ «ឧក្រិដ្ឋកម្មសង្គ្រាមដោយកងទ័ពអ៊ីស្រាអែល»។

លោក Volker Turk បានប្រាប់ក្រុមប្រឹក្សាសន្តិសុខអង្គការសហប្រជាជាតិថា៖ «ខ្ញុំតក់ស្លុតនឹងការសម្លាប់បុគ្គលិកពេទ្យ និងបុគ្គលិកជំនួយមនុស្សធម៌ ១៥នាក់ នាពេលថ្មីៗនេះ ដែលធ្វើឲ្យមានការព្រួយបារម្ភបន្ថែមទៀតពីការប្រព្រឹត្តឧក្រិដ្ឋកម្មសង្គ្រាមដោយយោធាអ៊ីស្រាអែល»។

ជាមួយគ្នានេះ លោក Turk បានអំពាវនាវឲ្យមាន «ការស៊ើបអង្កេតឯករាជ្យ រហ័ស និងហ្មត់ចត់» ជុំវិញឧប្បត្តិហេតុកាលពីថ្ងៃទី២៣ ខែមីនានេះ ដែលមន្ត្រីអ៊ីស្រាអែល បានអះអាងថា គឺជាការវាយប្រហារលើ «ភេរវករ»។

គួរបញ្ជាក់ថា សពអ្នកជួយសង្គ្រោះ និងបុគ្គលិកមនុស្សធម៌ចំនួន ១៥នាក់ ក្នុងនោះរួមទាំង ៨នាក់មកពីអឌ្ឍចន្ទក្រហមប៉ាឡេស្ទីន និងម្នាក់ទៀតមកពី UN ត្រូវបានគេរកឃើញនៅជិតទីក្រុង Rafah ជាអ្វីដែលការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ (OCHA) ហៅថា «ផ្នូរដ៏ធំ»៕