ប្រទេសអាល្លឺម៉ង់ និងអូទ្រីស កាលពីថ្ងៃព្រហស្បតិ៍ (ទី៣ ខែមេសា) បានឲ្យដឹងថា ពួកគេនឹងរារាំងមេដឹកនាំផ្តាច់ខ្លួនប៊ូស្នីដើមកំណើតស៊ែប៊ី លោក Milorad Dodik និងជំនួយការជិតស្និទ្ធបំផុត ២នាក់របស់លោក មិនឲ្យចូលដែនដីរបស់ពួកគេ ដោយចោទប្រកាន់លោកថា បានគំរាមកំហែងដល់សន្តិសុខរបស់ប្រទេស និងតំបន់ដែលមានភាពផុយស្រួយរបស់លោក។

លោក Dodik ដែលជាប្រធានាធិបតីនៃសាធារណរដ្ឋស៊ែប៊ីស្វយ័តរបស់ប្រទេសប៊ូស្នី បានបង្កឲ្យមានវិបត្តិរដ្ឋធម្មនុញ្ញ ដោយផ្គើននឹងការសម្រេចរបស់បេសកជនអន្តរជាតិ ដែលមានតួនាទីការពាររដ្ឋបាល់កង់ពហុជាតិសាសន៍កុំឲ្យធ្លាក់ចូលទៅក្នុងជម្លោះ។

បញ្ហានោះបានធា្លក់ចូលទៅក្នុងការប្រឈមមុខដាក់គ្នាផ្នែកច្បាប់ និងនយោបាយ ដែលធ្វើឲ្យលោក Dodik និងសម្ព័ន្ធមិត្តរបស់លោក គឺរុស្ស៊ី និងស៊ែប៊ី មើលមុខគ្នាមិនចំជាមួយសហរដ្ឋអាមេរិក និងសហភាពអឺរ៉ុប (EU) ហើយត្រូវបានគេមើលឃើញថា ជាការគំរាមកំហែងដ៏ធំបំផុតមួយ ចំពោះសន្តិភាព នៅតំបន់បាល់កង់ ចាប់តាំងពីមានជម្លោះក្នុងទសវត្សរ៍ឆ្នាំ១៩៩០។

រដ្ឋមន្ត្រីការបរទេសអូទ្រីស លោក Beate Meinl Reisinger បានឲ្យដឹងកាលពីថ្ងៃព្រហស្បតិ៍ថា លោក Dodik បានធ្វើសកម្មភាពញុះញង់ និងអបគមន៍ទៅដល់កម្រិតជ្រុលនិយមថ្មីមួយ ហើយបានឆ្លងកាត់បន្ទាត់ស្របច្បាប់។

អំឡុងដំណើរទស្សនកិច្ចទៅកាន់រដ្ឋធានី Sarajevo របស់ប្រទេសប៊ូស្នីជាមួយរដ្ឋមន្ត្រីការបរទេសអាល្លឺម៉ង់ទទួលបន្ទុកកិច្ចការអឺរ៉ុប និងអាកាសធាតុ គឺលោកស្រី Anna Luhrmann លោកស្រី Reisinger បាននិយាយថា៖ «យើងលែងចង់ទទួលយកបុគ្គលមានអាកប្បកិរិយាបែបនេះទៀតហើយ»។

រដ្ឋមន្ត្រីទាំង២ បានចេញសេចក្តីថ្លែងការណ៍រួមមួយ ដោយលើកឡើងថា ចំណាត់ការរបស់មេដឹកនាំប៊ូស្នីដើមកំណើតស៊ែប៊ីរូបនេះ កំពុងរារាំងដំណើរការចូលជាសមាជិកសហភាពអឺរ៉ុប (EU) របស់ប៊ូស្នី និងធ្វើឲ្យអនាគតរបស់ប្រទេស នៅ EU ស្ថិតក្នុងហានិភ័យ៕