ក្រុមឧទ្ទាម M23 ដែលគាំទ្រដោយប្រទេសរ៉្វាន់ដា នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ បានដកកងកម្លាំងរបស់ខ្លួនចេញពីទីក្រុងយុទ្ធសាស្ត្រ Walikale ដោយពណ៌នាពីចំណាត់ការនេះថា ជាកាយវិការប្រកបដោយសុច្ឆន្ទៈ នៅមុនកិច្ចពិភាក្សាសន្តិភាពដែលត្រូវបានគ្រោងទុកជាមួយរដ្ឋាភិបាល នាសប្តាហ៍ក្រោយ។

គួរបញ្ជាក់ថា ក្រុម M23 បានដណ្ដើមកាន់កាប់ទីក្រុងធំៗចំនួន ២ នៅភាគខាងកើតកុងហ្គោ អំឡុងការរុលទៅមុខយ៉ាងលឿន ចាប់តាំងពីខែមករា ជាការវាយលុកដែលបានបណ្តាលឲ្យមនុស្សរាប់ពាន់នាក់បាត់បង់ជីវិត និងបង្ខំឲ្យមនុស្សរាប់សែននាក់ទៀតភៀសខ្លួនចេញពីផ្ទះសម្បែងរបស់ពួកគេ។

ការប្រយុទ្ធគ្នានេះ បានធ្វើឲ្យមានការភ័យខ្លាចកាន់តែខ្លាំងឡើងៗពីការរីករាលដាលសង្គ្រាមកាន់តែធំគ្រប់ទិសទី នៅក្នុងតំបន់ ខណៈដែលប្រទេសជិតខាងរបស់កុងហ្គោ គឺអ៊ូហ្គង់ដា និងប៊ូរុនឌី ក៏មានទាហាននៅក្នុងតំបន់ដែរ។ ប្រភពពីភាគីទាំង២ បានប្រាប់សារព័ត៌មាន Reuters នៅសប្តាហ៍នេះថា រដ្ឋាភិបាលកុងហ្គោ និងក្រុម M23 គ្រោងនឹងធ្វើការចរចាដោយផ្ទាល់ជាលើកដំបូង នៅទីក្រុងដូហា ប្រទេសកាតា នាថ្ងៃទី៩ ខែមេសា។

ដោយស្ថិតនៅតាមបណ្តោយផ្លូវតភ្ជាប់ខេត្តកុងហ្គោភាគខាងកើតចំនួន ៤ ទីក្រុង Walikale គឺស្ថិតនៅក្នុងតំបន់ដែលសម្បូរទៅដោយសារធាតុរ៉ែ ក្នុងនោះរួមទាំងសំណប៉ាហាំងផងដែរ។ ក្រុម M23 បានសន្យាថា នឹងដកចេញពីទីក្រុង Walikale កាលពីខែមុន តែដំបូងឡើយ មិនបានធ្វើដូច្នេះទេ ដោយចោទប្រកាន់កងទ័ពកុងហ្គោថា បានលេបសម្ដីរបស់ខ្លួន និងមិនបានដកយានដ្រូនវាយប្រហារចេញ៕