បេក្ខជនប្រធានាធិបតីរ៉ូម៉ានី បានចាប់ផ្តើមយុទ្ធនាការបោះឆ្នោតរបស់ពួកគេ នៅថ្ងៃសុក្រ (ទី៤ ខែមេសា) នេះ ដោយចូលរួមជាមួយអ្នកស្ម័គ្រចិត្ត ក្នុងការដំឡើងបដាឃោសនា និងប្តេជ្ញាស្តាប់អ្នកបោះឆ្នោត នៅមុនការបោះឆ្នោតឡើងវិញ ដែលអាចកំណត់ថា តើរ៉ូម៉ានីនៅតែគាំទ្រលោកខាងលិចដែរ ឬទេ។

ប្រទេសសមាជិកសហភាពអឺរ៉ុប (EU) និងអង្គការណាតូ (NATO) ដែលមានព្រំប្រទល់ជាប់ប្រទេសអ៊ុយក្រែន នឹងរៀបចំការបោះឆ្នោតឡើងវិញចំនួន ២ជុំ នៅថ្ងៃទី៤ និងទី១៨ ខែឧសភា បន្ទាប់ពីតុលាការធម្មនុញ្ញ បានចាត់ទុកជាមោឃភាព សម្រាប់លទ្ធការបោះឆ្នោតដំបូង កាលពីខែធ្នូឆ្នាំមុន ដោយសារមានការចោទប្រកាន់ពីការជ្រៀតជ្រែករបស់រុស្ស៊ី ដែលទីក្រុងមូស្គូបានបដិសេធ។

បន្ទាប់ពីលទ្ធផលត្រូវបានលុបចោល ហើយបេក្ខជននាំមុខគេខាងក្រុមស្ដាំនិយមជ្រុល គឺលោក Calin Georgescu មិនបានចូលរួមក្នុងការបោះឆ្នោតលើកនេះ ក្រុមអ្នកជាតិនិយមជ្រុល បានបង្កើតក្រុមថ្មីដោយគាំទ្រលោក George Simion មេដឹកនាំគណបក្សប្រឆាំង គឺសម្ព័ន្ធបង្រួបបង្រួមរ៉ូម៉ានី (AUR) ដែលជាគណបក្សធំទី២ របស់រូម៉ានី។

ការស្ទង់មតិដែលបានចេញផ្សាយកាលពីខែមីនា បង្ហាញថា លោក Simion កំពុងនាំមុខគេក្នុងជុំទី១ ដោយមានបេក្ខជនឯករាជ្យ ២រូប ជាប់លំដាប់ទី២ ដូចគ្នា។ លោក Simion និងបក្ស AUR គឺជាអ្នកគាំទ្រលោក Georgescu ដោយហៅការលុបចោលលទ្ធផលការបោះឆ្នោតនោះថា ជារដ្ឋប្រហារ។

អភិបាលក្រុង Bucharest ខាងក្រុមកណ្ដាលនិយម គឺលោក Nicusor Dan ដែលកំពុងចូលប្រកួតប្រជែងក្នុងនាមជាបេក្ខជនឯករាជ្យ បានប្តេជ្ញាថា នឹងដឹកនាំប្រទេសរ៉ូម៉ានីទៅក្នុងទិសដៅត្រឹមត្រូវ។ លោក Dan គឺជាអ្នកគាំទ្រសហភាពអឺរ៉ុប និងអង្គការណាតូ ព្រមទាំងជាអ្នកគាំទ្រជំនួយ សម្រាប់អ៊ុយក្រែនផងដែរ៕

អតីតនាយករដ្ឋមន្ត្រីឆ្វេងនិយម គឺលោក Victor Ponta ដែលនយោបាយរបស់លោក បានប្រែក្លាយទៅជាអ្នកជាតិនិយមជ្រុល ហើយចូលរួមប្រកួតប្រជែងក្នុងនាមជាបេក្ខជនឯករាជ្យ បានស្នើឡើងជជែកដេញដោលជាមួយលោក Simion។ ទាំងលោក Dan និងលោក Ponta ត្រូវបានគេមើលឃើញថា នឹងប្រកួតប្រជែងគ្នាយ៉ាងស្វិតស្វាញ សម្រាប់តំណែងទី២ នៅក្នុងការបោះឆ្នោតជុំទី២៕