នាយករដ្ឋមន្ត្រីកាណាដា លោក Mark Carney បានចាត់ទុកការដំឡើងពន្ធរបស់ប្រធានាធិបតីសហរដ្ឋអាមេរិក លោក Donald Trump ថា «តឹងតែង» ប៉ុន្តែក៏ជាឱកាសមួយសម្រាប់ប្រទេសកាណាដា ខណៈលោកបានធ្វើទស្សនកិច្ចនៅរោងចក្រផលិតរថយន្តមួយកន្លែង កាលពីថ្ងៃសុក្រ នៅ ទីក្រុងWoodbridge រដ្ឋ Ontario ។

លោក Carney បានប្រាប់ថ្នាក់ដឹកនាំនិងបុគ្គលិករោងចក្រថា «យើងកំពុងធ្វើរឿងបី។ យើងនឹងប្រយុទ្ធប្រឆាំង យើងនឹងការពារ ហើយយើងនឹងសាងសង់»។

លោក Trump បានដំឡើងពន្ធ២៥% លើដែកថែប និងអាលុយមីញ៉ូមរបស់ប្រទេសកាណាដាចាប់តាំងពីខែមីនា ហើយបានដាក់ពន្ធនាំចូលរថយន្តនិងគ្រឿងបន្លាស់ ដោយផ្អែកលើខ្លឹមសារមិនពាក់ព័ន្ធអាមេរិក និងមិនពាក់ព័ន្ធទៅនឹងកិច្ចព្រមព្រៀងពាណិជ្ជកម្មសេរី។ លោកក៏បានប្រកាសពីការដំឡើងពន្ធបដិការ សំដៅលើដៃគូពាណិជ្ជកម្មទាំងអស់របស់សហរដ្ឋអាមេរិក។

យោងតាមទិន្នន័យកាលពីថ្ងៃសុក្របានឲ្យដឹងថា ការងារសរុបរបស់ប្រទេសកាណាដា បានធ្លាក់ចុះ ហើយអត្រាគ្មានការងារធ្វើបានកើនឡើងនៅក្នុងខែមីនា ដោយសារភាពមិនច្បាស់លាស់ជុំវិញការដំឡើងពន្ធ និងការអនុវត្តជាបន្តបន្ទាប់ដែលបានបង្ខំឱ្យក្រុមហ៊ុនជាច្រើនផ្អាកការជួល និងជំរុញឱ្យមានការកាត់រំសាយបុគ្គលិកមួយចំនួន។

ធនាគារកាណាដា បាននិយាយកាលពីខែមុនថា ប្រជាជនកាណាដា មានការព្រួយបារម្ភកាន់តែខ្លាំងអំពីសុវត្ថិភាពការងារ និងស្ថានភាពហិរញ្ញវត្ថុរបស់ពួកគេ បណ្តាលមកពីភាពតានតឹងពាណិជ្ជកម្ម ហើយពួកគេមានបំណងចំណាយដោយប្រុងប្រយ័ត្នជាងមុន។