ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍នៅថ្ងៃសៅរ៍ទី៥ ខែមេសានេះអំពីសេចក្តីសម្រេចរបស់តុលាការកំពូលរបស់ប្រទេសកូរ៉េខាងត្បូង ក្នុងការបណ្តេញប្រធានាធិបតីដែលត្រូវបានចោទប្រកាន់ទម្លាក់ពីតំណែង គឺលោក Yoon Suk Yeol ។

តុលាការធម្មនុញ្ញរបស់ប្រទេសកូរ៉េខាងត្បូង បានបណ្តេញប្រធានាធិបតីដែលត្រូវបានចោទប្រកាន់កាលពីថ្ងៃសុក្រ ទី ៤ ខែមេសា ជុំវិញការប៉ុនប៉ងដាក់ច្បាប់អាជ្ញាសឹកដ៏ភ្ញាក់ផ្អើលរបស់លោក កាលពីក្នុងខែធ្នូ។

សារព័ត៌មានKCNA បាននិយាយថា ចៅក្រមទាំងប្រាំបីរូបនៃតុលាការធម្មនុញ្ញរបស់ប្រទេសកូរ៉េខាងត្បូងបានបោះឆ្នោតដកលោក Yoon ចេញពីតំណែង ហើយថែមទាំងបាននិយាយថា ប្រព័ន្ធផ្សព្វផ្សាយបរទេសធំៗ បានរាយការណ៍ភ្លាមៗអំពីសេចក្តីសម្រេចនេះ។

លោក Yoon បានប្រកាន់ជំហរតឹងរ៉ឹងលើប្រទេសកូរ៉េខាងជើង ហើយជារឿយៗជាគោលដៅនៃការរិះគន់ពីទីក្រុងព្យុងយ៉ាង។ 

ក្នុងអំឡុងពេលកាន់តំណែងជាប្រធានាធិបតីរយៈពេលខ្លីរបស់លោក កូរ៉េខាងជើងបានផ្លាស់ប្តូរគោលនយោបាយបង្រួបបង្រួមដែលមានរយៈពេលជាច្រើនទសវត្សរ៍ជាមួយប្រទេសកូរ៉េខាងត្បូង ហើយបានផ្លាស់ប្តូររដ្ឋធម្មនុញ្ញរបស់ខ្លួនដើម្បីកំណត់ថាប្រទេសនេះជា «សត្រូវសំខាន់»។