ភ្នំពេញ៖ សម្ដេចតេជោ ហ៊ុន សែន បានចាត់គណៈកម្មការបុណ្យព្រះសពសម្ដេចក្រុមព្រះ នរោត្ដម រណឫទ្ធិ ខណៈសពរបស់ទ្រង់នឹងត្រូវដឹកតាមយន្តហោះពិសេសពីប្រទេសបារាំងមកកម្ពុជានៅចុងសប្ដាហ៍នេះ។
ក្នុងសេចក្ដីសម្រេចចេញនៅថ្ងៃនេះ ប្រមុខរាជរដ្ឋាភិបាលកម្ពុជា បានចាត់តាំងគណៈកម្មការមួយ សម្រាប់រៀបចំបុណ្យព្រះសពសម្ដេចក្រុមព្រះ នរោត្ដម រណឫទ្ធិ ដែលគណៈកម្មការនេះមានសមាសភាពរហូតដល់ ២៨រូប និងដឹកនាំដោយសម្ដេចចៅហ្វាវាំង គង់ សំអុល។
មន្ត្រីនាំពាក្យគណបក្សរាជានិយមហ៊្វុនស៊ិនប៉ិច បានប្រាប់ BTV នៅថ្ងៃនេះថា ព្រះសពសម្ដេចក្រុមព្រះ នរោត្ដម រណឫទ្ធិ នឹងត្រូវដឹកមកដល់កម្ពុជានៅម៉ោង ១១ព្រឹក ថ្ងៃទី០៥ ខែធ្នូនេះ។
បើតាមមន្ត្រីគណបក្សហ៊្វុនស៊ិនប៉ិច ព្រះសពសម្ដេចក្រុមព្រះ នរោត្ដម រណឫទ្ធិ នឹងត្រូវតម្កល់រៀបចំធ្វើបុណ្យតាមប្រពៃណីសាសនានៅលំនៅដ្ឋានមួយកន្លែងស្ថិតនៅផ្លូវសម្ដេចប៉ាន ក្នុងសង្កាត់បឹងរាំង ខណ្ឌដូនពេញ។
សម្ដេចក្រុមព្រះ នរោត្ដម រណឫទ្ធិ ដែលជាប្រធានគណបក្សហ៊្វុនស៊ិនប៉ិច និងជាព្រះប្រធានក្រុមប្រឹក្សាផ្ទាល់ព្រះមហាក្សត្រ បានចូលទិវង្គតកាលពីថ្ងៃទី២៨ ខែវិច្ឆិកាកន្លងមកនេះ ក្នុងព្រះជន្ម ៧៧វស្សា។
សម្ដេចក្រុមព្រះ នរោត្ដម រណឫទ្ធិ គឺជានាយករដ្ឋមន្ត្រី១នៅចន្លោះឆ្នាំ១៩៩៣ ដល់ឆ្នាំ១៩៩៧ ហើយបន្ទាប់មកកាន់តំណែងជាប្រធានរដ្ឋសភានៅចន្លោះឆ្នាំ១៩៩៨ រហូតដល់ឆ្នាំ២០០៦៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
