អង្គការសុខភាពពិភពលោក (WHO) បានលើកឡើងពីការព្រួយបារម្ភយ៉ាងធ្ងន់ធ្ងរចំពោះការកើនឡើងយ៉ាងខ្លាំងនៃការឆ្លងជំងឺអាសន្នរោគ និងការស្លាប់ជាសកល ដោយព្រមានថា ជំងឺនេះ កំពុងរីករាលដាលទៅកាន់តំបន់ថ្មី និងគំរាមកំហែងដល់ប្រជាជនដែលងាយរងគ្រោះ ដែលមានបន្ទុករួចហើយដោយជម្លោះ និងវិបត្តិទាក់ទងនឹងអាកាសធាតុ។

ថ្លែងនៅទីក្រុងហ្សឺណែវកាលពីថ្ងៃសុក្រ លោកវេជ្ជបណ្ឌិត Philippe Barboza ប្រធានក្រុមជំងឺអាសន្នរោគនៅអង្គការសុខភាពពិភពលោក បាននិយាយថា ករណីឆ្លងជាង ១០០.០០០ករណី និង អ្នកជំងឺស្លាប់ចំនួន ១.៣០០នាក់ ត្រូវបានរាយការណ៍នៅទូទាំងពិភពលោករួចហើយ នៅក្នុងប៉ុន្មានខែដំបូងនៃឆ្នាំ ២០២៥។

ទិន្នន័យបឋមពីឆ្នាំ ២០២៤ បានបង្ហាញពីករណីឆ្លងចំនួន ៨១០.000 ករណី និងអ្នកជំងឺស្លាប់ចំនួន ៥.៩០០នាក់ ដែលបានកើនឡើងគួរឲ្យកត់សម្គាល់ បើប្រៀបធៀបទៅនឹងឆ្នាំ ២០២៣។ ទោះជាយ៉ាងណាក៏ដោយ លោក Barboza បានព្រមានថា ចំនួនពិតប្រាកដទំនងជាខ្ពស់ជាងនេះ ដោយសារតែការរាយការណ៍មិនពេញលេញ។

លោកបាននិយាយថា «ជំងឺអាសន្នរោគមិនគួរមាន នៅក្នុងសតវត្សទី ២១ ទេ» ។«ឥឡូវនេះ ជំងឺនេះកំពុងរាលដាលដល់ប្រទេស ដែលវាមិនធ្លាប់មានពីមុនមក ដូចជាប្រទេសណាមីប៊ី និងកេនយ៉ា»។