ប្រទេសកូរ៉េខាងជើង នៅថ្ងៃអាទិត្យ (០៦ មេសា) នេះ កំពុងរៀបចំកម្មវិធីប្រកួតរត់ម៉ារ៉ាតុងអន្តរជាតិទីក្រុងព្យុងយ៉ាង ជាលើកដំបូងរបស់ខ្លួនក្នុងរយៈពេល ៦ឆ្នាំ ដោយធ្វើជាម្ចាស់ផ្ទះទទួលអ្នករត់ប្រណាំងបរទេសនៅក្នុងប្រទេសផ្តាច់ខ្លួនមួយនេះ ដែលបានបិទព្រំដែនភាគច្រើនក្នុងអំឡុងពេលជំងឺរាតត្បាតកូវីដ១៩ ដ៏កាចសាហាវ។

អត្តពលិកជាច្រើនមកពីចិន រូម៉ានី និងប្រទេសផ្សេងទៀត បានទៅដល់កូរ៉េខាងជើង ដើម្បីចូលរួមក្នុងព្រឹត្តិការណ៍នេះ នេះបើតាមសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋ KCNA និង Rodong Sinmun នាថ្ងៃអាទិត្យ។

លោក Simon Cockerell អ្នកគ្រប់គ្រងទូទៅនៅស្ថាប័ន Koryo Tours មានមូលដ្ឋាននៅទីក្រុងប៉េកាំង បាននិយាយនៅក្នុងការបង្ហោះ Instagram ដោយបង្ហាញផ្លូវ និងកន្លែងកម្សាន្តក្នុងទីក្រុងព្យុងយ៉ាងថា អ្នកដំណើរប្រមាណ ២០០នាក់ បានទៅកាន់រដ្ឋធានីកូរ៉េខាងជើងមួយនេះកាលពីថ្ងៃសុក្រ និងថ្ងៃសៅរ៍ ហើយអ្នករត់មកពីក្រៅប្រទេសបានហ្វឹកហាត់នៅសណ្ឋាគារមួយក្នុងទីក្រុងព្យុងយ៉ាង សម្រាប់ការប្រណាំងនៅថ្ងៃអាទិត្យនេះ។

ការរត់ម៉ារ៉ាតុង គឺជាដំណើរទៅមក ដែលរត់កាត់កណ្តាលទីក្រុងព្យុងយ៉ាង ឆ្លងកាត់តំបន់សំខាន់ៗរបស់ទីក្រុងព្យុងយ៉ាង ដោយឆ្ពោះទៅកាន់ទីជនបទនៅខាងក្រៅកណ្តាលទីក្រុង រួចត្រលប់ទៅកីឡដ្ឋានវិញ ជាមួយនឹងហ្វូងមនុស្សក្នុងស្រុកចំនួន ៥០.០០០នាក់ នេះបើយោងតាមក្រុមហ៊ុនទេសចរណ៍ Koryo Tours៕