រូបិយប័ណ្ណរីយ៉ាល់ (IRR) របស់អ៊ីរ៉ង់ បានជួញដូរក្នុងកម្រិតទាបបំផុតធៀបនឹងប្រាក់ដុល្លារអាមេរិក កាលពីថ្ងៃសៅរ៍ (០៥ មេសា) ខណៈប្រទេសនេះបានវិលត្រឡប់មកធ្វើការវិញបន្ទាប់ពីថ្ងៃឈប់សម្រាកដ៏យូរ ដោយអ្នកស្រុកត្រូវចំណាយលើសពី ១លានរីយ៉ាល់ សម្រាប់ប្រាក់ ១ដុល្លារអាមេរិក ដោយសារតែភាពតានតឹងរវាងទីក្រុងតេអេរ៉ង់ និងទីក្រុងវ៉ាស៊ីនតោន ទំនងជានឹងជំរុញឱ្យតម្លៃរូបិយបណ្ណកាន់តែទាប។

អត្រាប្តូរប្រាក់បានធ្លាក់ចុះដល់ទៅជាង ១លានរីយ៉ាល់ ក្នុងអំឡុងបុណ្យចូលឆ្នាំថ្មីតាមសាសនារបស់អ៊ិស្លាម ខណៈហាងរូបិយប័ណ្ណបានបិទ ហើយមានតែការជួញដូរក្រៅផ្លូវការប៉ុណ្ណោះដែលធ្វឡើងនៅតាមដងផ្លូវ ដែលបង្កើតសម្ពាធបន្ថែមទៀតលើទីផ្សារ។ ប៉ុន្តែនៅពេលពាណិជ្ជករបានបន្តការងារកាលពីថ្ងៃសៅរ៍ អត្រានេះធ្លាក់ចុះបន្ថែមទៀតដល់ ១.០៤៣.០០០រីយ៉ាល់ ក្នុង ១ដុល្លារ ដែលជាសញ្ញាថា កម្រិតទាបថ្មីបានលេចឡើងនៅទីនេះ។

នៅតាមផ្លូវក្នុងរដ្ឋធានីតេអេរ៉ង់ របស់អ៊ីរ៉ង់ ដែលជាចំណុចកណ្ដាលនៃការផ្លាស់ប្តូរប្រាក់របស់ប្រទេសនេះ ពាណិជ្ជករមួយចំនួនបានបិទស្លាកសញ្ញាអេឡិចត្រូនិករបស់ពួកគេ ដែលបង្ហាញពីអត្រានឹងកើនឡើង ខណៈភាពមិនប្រាកដប្រជាបន្តកើតមានអំពីថា តើប្រាក់រីយ៉ាល់អាចធ្លាក់ចុះបន្ថែមទៀតឬទេ។

សេដ្ឋកិច្ចរបស់អ៊ីរ៉ង់ ត្រូវបានរងផលប៉ះពាល់យ៉ាងធ្ងន់ធ្ងរដោយទណ្ឌកម្មអន្តរជាតិ ជាពិសេសបន្ទាប់ពីលោកប្រធានាធិបតីអាមេរិក Donald Trump បានដកអាមេរិកជាឯកតោភាគី ចេញពីកិច្ចព្រមព្រៀងនុយក្លេអ៊ែររបស់ទីក្រុងតេអេរ៉ង់ ជាមួយមហាអំណាចពិភពលោកផ្សេងទៀតក្នុងឆ្នាំ២០១៨៕