ក្រុមអ្នកជំនាញបានបន្តការព្រមានរបស់ពួកគេថា ការដាក់ចេញពន្ធដ៏ច្រើនសន្ធឹកសន្ធាប់របស់លោកប្រធានាធិបតីអាមេរិក Donald Trump លើដៃគូពាណិជ្ជកម្មទាំងឡាយរបស់ទីក្រុងវ៉ាស៊ីនតោន នឹងអូសទាញប្រទេសនេះឱ្យធ្លាក់ទៅក្នុងវិបត្តិសេដ្ឋកិច្ចធ្ងន់ធ្ងរ បង្កឱ្យមានការធ្លាក់ចុះកំណើនជាសកល និងបញ្ជូនរលករង្គើរង្គើតាមរយៈទីផ្សារដ៏ច្របូកច្របល់។

គួរឱ្យដឹងថា លើសពីពន្ធបដិការលើពិភពលោកដែលបានប្រកាសកាលពីថ្ងៃ០២ មេសា ពន្ធ ២៥% របស់លោក Trump លើយានយន្តនាំចូល ក៏បានចូលជាធរមានកាលពីថ្ងៃព្រហស្បតិ៍សប្ដាហ៍មុនផងដែរ ដោយពង្រីកសង្រ្គាមពាណិជ្ជកម្មពិភពលោកឱ្យកាន់តែធំ ដែលលោកបានចាប់ផ្ដើមនៅពេលត្រលប់មកសេតវិមានក្នុងខែមករា។

ថ្លែងជាមួយបណ្តាញទូរទស្សន៍ចិនសកល (CGTN) លោក Joseph Williams អតីតនិពន្ធនាយកជាន់ខ្ពស់នៃសារព័ត៌មាន US News and World Report បានព្រមានពីអតិផរណាដ៏ខ្ពស់ ការបាត់បង់ការងារដែលអាចកើតមាន និងហានិភ័យកើនឡើងនៃវិបត្តិសេដ្ឋកិច្ចអាមេរិក និងសកលលោក។ ជាមួយគ្នានេះ ភាគហ៊ុនអាមេរិកបានបន្តធ្លាក់ចុះខ្លាំង បន្ទាប់ពីការបង្ហាញពីកញ្ចប់ពន្ធដ៏ធំទូលាយរបស់លោក Trump។

នៅក្នុងបទសម្ភាសន៍ដាច់ដោយឡែកមួយជាមួយ CGTN អ្នកជំនាញមួយរូបទៀត គឺលោក Michael Collins នាយកប្រតិបត្តិនៃស្ថាប័ន WinCap Financial បាននិយាយថា ភាគហ៊ុនរបស់សហរដ្ឋអាមេរិក រងផលប៉ះពាល់ខ្លាំងបំផុតដោយសារវិបត្តិនេះ ហើយថា មានតែការបញ្ច្រាសពន្ធពេញលេញប៉ុណ្ណោះ ដែលអាចបង្កឱ្យមានការងើបឡើងវិញបាន៕