មន្ត្រីជាន់ខ្ពស់អ៊ីរ៉ង់មួយរូបបាននិយាយថា ទីក្រុងតេអេរ៉ង់ ចង់ចរចាដោយប្រយោលជាមួយសហរដ្ឋអាមេរិក ខណៈខ្លួនកំពុងរុញច្រានតបតប្រឆាំងនឹងការទាមទាររបស់ទីក្រុងវ៉ាស៊ីនតោន ដែលចង់ឱ្យអ៊ីរ៉ង់ចរចាដោយផ្ទាល់លើកម្មវិធីនុយក្លេអ៊ែរ បើមិនដូច្នេះនឹងរងការវាយប្រហារ ដោយព្រមានប្រទេសជិតខាងដែលមានមូលដ្ឋានទ័ពអាមេរិកថា ពួកគេអាចស្ថិតក្នុងខ្សែបន្ទាត់បាញ់ប្រហារតបត ប្រសិនបើពាក់ព័ន្ធនឹងសកម្មភាពណាមួយប្រឆាំងនឹងអ៊ីរ៉ង់។

មន្រ្តីអ៊ីរ៉ង់រូបនោះបន្តថា ទោះបីជាទីក្រុងតេអេរ៉ង់ បានច្រានចោលការទាមទាររបស់ប្រធានាធិបតីអាមេរិក លោក Donald Trump សម្រាប់ការចរចាដោយផ្ទាល់ក៏ដោយ ក៏ខ្លួនចង់បន្តការចរចាដោយប្រយោលតាមរយៈប្រទេសអូម៉ង់ ដែលជាបណ្តាញដ៏យូរសម្រាប់សារឆ្លើយឆ្លងរវាងរដ្ឋគូប្រជែងទាំងពីរនេះ។

មន្ត្រីរូបនោះលើកឡើងថា "កិច្ចពិភាក្សាដោយប្រយោល ផ្តល់ឱកាសឱ្យវាយតម្លៃភាពម៉ឺងម៉ាត់របស់ទីក្រុងវ៉ាស៊ីនតោន អំពីដំណោះស្រាយនយោបាយជាមួយអ៊ីរ៉ង់" ហើយ ទោះបីជាផ្លូវនោះអាចពិបាកក៏ដោយ ប៉ុន្តែកិច្ចពិភាក្សាបែបនេះអាចចាប់ផ្តើមក្នុងពេលឆាប់ៗ ប្រសិនបើអាមេរិកគាំទ្រ។

លើសពីនេះ មន្រ្តីដែលសុំមិនបញ្ចេញឈ្មោះរូបនោះបន្ថែមថា អ៊ីរ៉ង់បានចេញសេចក្តីជូនដំណឹងដល់ប្រទេសក្នុងតំបន់ ដូចជាអ៊ីរ៉ាក់ គុយវ៉ែត អារ៉ាប់រួម កាតា ទួរគី និងបារ៉ែនថា រាល់ការគាំទ្រសម្រាប់ការវាយប្រហាររបស់អាមេរិកលើអ៊ីរ៉ង់ រួមទាំងការប្រើប្រាស់លំហអាកាស ឬទឹកដីរបស់ពួកគេដោយយោធាអាមេរិក អំឡុងពេលមានការវាយប្រហារ នឹងត្រូវចាត់ទុកថាជាអំពើអរិភាព ហើយទង្វើបែបនេះ "នឹងមានផលវិបាកធ្ងន់ធ្ងរដល់ពួកគេ"៕