លោកប្រធានាធិបតីអាមេរិក Donald Trump និងទីប្រឹក្សារបស់លោក បានចេញមុខការពារវិធានការដំឡើងពន្ធលើការនាំចូល ហើយបានប្តេជ្ញាថានឹងបន្តបោះជំហានទៅមុខ ទោះបីជាមានភាពចលាចលទីផ្សារ និងការអំពាវនាវឱ្យជៀសវាងសង្គ្រាមពាណិជ្ជកម្មក៏ដោយ។

នៅក្នុងបទសម្ភាសន៍តាមទូរទស្សន៍ជាបន្តបន្ទាប់ រដ្ឋមន្ត្រីក្រសួងរតនាគារលោក Scott Bessent បានព្យាយាមសម្រាលការធ្លាក់ចុះទីផ្សារភាគហ៊ុននាពេលថ្មីៗនេះ ហើយលោក Howard Lutnick រដ្ឋមន្ត្រីក្រសួងពាណិជ្ជកម្ម បានទទូចថា ការដំឡើងពន្ធនឹងត្រូវបានអនុវត្តតាមការគ្រោងទុក។

លោក Bessent បាននិយាយថាពុំមាន "ហេតុផល" ក្នុងការរំពឹងថានឹងមានវិបត្តិសេដ្ឋកិច្ចដោយសារតែភាពចលាចលនោះទេ។ លោកថានេះជាដំណើរការកែសម្រួលមួយ។

ថ្លែងទៅកាន់អ្នកសារព័ត៌មាននៅលើយន្តហោះ Air Force One កាលពីល្ងាចថ្ងៃអាទិត្យ លោក Trump បាននិយាយថា បណ្តាប្រទេសនៅអឺរ៉ុប និងអាស៊ី "កំពុងប្រឹងប្រែងធ្វើកិច្ចព្រមព្រៀង" ។

លោកក៏បានវាយបកផងដែរទៅនឹងការស៊ើបអង្កេតរបស់អ្នកយកព័ត៌មានអំពី "កម្រិតនៃការរងទុក្ខ" របស់អ្នកប្រើប្រាស់អាមេរិក ដោយសារការភ័យខ្លាចនៃការកើនឡើងតម្លៃទំនិញដ៏ខ្ពស់ និងការធ្លាក់ចុះទីផ្សារកើនឡើង។

លោកបានប្រាប់អ្នកសារព័ត៌មានថា លោកគិតថាសំណួររបស់អ្នកគឺជារឿងផ្ដេសផ្ដាស ។ លោកមិនចង់ឱ្យអ្វីគ្រប់យ៉ាងធ្លាក់ចុះទេ ៕